మహిళల పట్ల క్యాబ్డ్రైవర్ల దురుసు ప్రవర్తనకు సంబంధించి మరో సంఘటన వెలుగుచూసింది. బెంగళూరులో ఓ మహిళతో ఊబెర్క్యాబ్ డ్రైవర్ అసభ్యంగా ప్రవర్తించాడు. ఆ విషయంపై ఫిర్యాదు చేసినా ఊబెర్ కస్టమర్ కేర్ సర్వీస్ నుంచి సరైన స్పందన లేకపోవడంతో సోషల్మీడియాలో పెద్ద చర్చకు దారితీసింది. అపర్ణ బాలచందర్ అనే ఆ మహిళ తనకు ఎదురైన ఈ అనుభవాన్ని ట్విట్టర్ ద్వారా వెల్లడించారు. ఆమె శనివారం రాత్రి 11 గంటల సమయంలో ఊబెర్ క్యాబ్ బుక్ చేసుకుంది. ఆమె ఎక్కాక అప్పటికే డ్రైవర్ ఫోన్లో మాట్లాడుతూ మహిళల పట్ల అసభ్యకర వ్యాఖ్యలు చేస్తున్నాడు. కొద్దిసేపటికి సడెన్గా అపర్ణ వైపు తిరిగి, ‘మీరు చదువుకున్న వాళ్లే కదా. 7కి ముందే ఇంటికి వెళ్లాలని తెలియదా? కొలీగ్స్తో కలిసి మందు కొట్టేందుకు ఎందుకు వెళతారు?’ అని ప్రశ్నించాడు. దీంతో షాక్అయిన ఆమె ‘నేనేమీ తాగలేదు. అయినా నా గురించి నీకెందుకు?’ అనడంతో అతడు తిట్టడం మొదలుపెట్టాడు. భయపడిపోయిన ఆమె ఊబెర్సేఫ్టీ బటన్నొక్కింది. అయితే, ఊబెర్ కస్టమర్ కేర్నుంచి ఆమెకు కాకుండా డ్రైవర్కు కాల్వచ్చింది. ఆమె చాలా ఎక్కువగా తాగిందని అతడు చెప్పాడు. ఆమె అరిచి తనకు భయమేస్తోందని, హెల్ప్కావాలని కోరగా, క్యాబ్నుంచి దిగాలని వెంటనే మరో క్యాబ్ పంపిస్తామని చెప్పారు. అప్పటికే డ్రైవర్.. ఆమెతో అసభ్యంగా మాట్లాడాడు. క్యాబ్ దిగుతవా.. లేదా బట్టలు చించేయమంటావా అంటూ అరిచాడు. రాత్రి 11.15 గంటలకు పెద్దగా మనుషులు లేని నడిరోడ్డుపై దిగాల్సి వచ్చిందని ఆమె తెలిపింది. తర్వాత ఊబెర్ నుంచి తనకు కాల్ రాలేదని, మరో క్యాబ్ కూడా పంపలేదని చెప్పారు. ఫ్రెండ్ సాయంతో ఇంటికి చేరుకున్నానని, కానీ ఆ డ్రైవర్ వల్ల చాలా భయపడిపోయానని వెల్లడించింది.
