టోక్యో : అమెరికాకు చెందిన ఓస్ప్రే ఎయిర్ క్రాఫ్ట్ జపాన్ సుముద్ర తీరంలో కుప్పకూలింది. బుధవారం యకుషిమా ద్వీపంలో ఈ ప్రమాదం చోటు చేసుకుంది. ఈ దుర్ఘటన జరిగినప్పుడు అందులో 8 మంది సిబ్బంది ప్రయాణిస్తున్నారు. ఇంజన్ వైఫల్యం కారణంగా ఈ ప్రమాదం చోటు చేసుకున్నట్టు తెలుస్తోంది. ప్రమాదాన్ని ముందుగా కొంత మంది యకుషిమా మత్స్యకారులు గుర్తించి కోస్ట్ గార్డ్ కు సమాచారమిచ్చారు. దీంతో కోస్ట్ గార్డ్ ఎయిర్ క్రాఫ్ట్, పెట్రోలింగ్ బోట్స్ సహాయక చర్యలు చేపట్టి ఓ వ్యక్తిని గుర్తించాయి. మిగిలిన వారిని గుర్తించేందుకు, వారి ప్రాణాలను రక్షించేందుకు ప్రయత్నిస్తున్నాయి. ఓస్ప్రే అనేది అమెరికా సైనిక విభాగానికి చెందిన ప్రత్యేకమైన వాహనం. ఇది హెలికాప్టర్, విమానంగాను రెండు రకాలుగా పనిచేస్తుంది. ఓస్ప్రే ఎయిర్ క్రాఫ్ట్లు 2012 నుంచి ఐదు సార్లు ప్రమాదానికి గురి కాగా 19 మంది మరణించారు.
