పేద దేశాల నుంచి అమెరికాకు వలసలు రద్దు చేస్తున్నం: ట్రంప్

• పేద దేశాల నుంచి అమెరికాకు వలసలు రద్దు చేస్తున్నం
• యూఎస్ ప్రెసిడెంట్ ట్రంప్ సంచలన ప్రకటన
• వలసదారులకు సబ్సిడీలు, ఫెడరల్ బెనిఫిట్స్ కూడా రద్దు 
• వైట్​హౌస్ సమీపంలో దాడి నేపథ్యంలో నిర్ణయం

    
వాషింగ్టన్: అమెరికా అధ్యక్షుడు డొనాల్డ్ ట్రంప్ వలస విధానంపై సంచలన ప్రకటన చేశారు. పేద దేశాల (థర్డ్​వరల్డ్ కంట్రీస్) నుంచి వలసలను శాశ్వతంగా నిలిపివేస్తున్నట్టు ప్రకటించారు. అలాగే, వలసదారులకు అన్నిరకాల సబ్సిడీలు, ఫెడరల్ బెనిఫిట్స్ కూడా రద్దు చేస్తున్నట్టు వెల్లడించారు. బుధవారం మధ్యాహ్నం వైట్ హౌస్ సమీపంలో అఫ్గాన్ జాతీయుడు ఇద్దరు నేషనల్ గార్డ్స్‌‌‌‌‌‌‌‌పై కాల్పులు జరిపిన తర్వాత ట్రంప్ ఈ కీలక ప్రకటన చేశారు. గురువారం ఆయన తన  ట్రూత్​సోషల్​లో ‘‘అంతా ముగించేస్తాను’’ టైటిల్​తో సుదీర్ఘ పోస్ట్​పెట్టారు. “అమెరికా ఎంత పురోగమించినా.. గత ప్రభుత్వ తప్పుడు వలస విధానాలు దేశాన్ని బలహీనపరిచాయి. ఇప్పుడు దేశాన్ని మళ్లీ బాగు చేసుకోవడానికి కొంత సమయం కావాలి. ఇందుకోసం పేద దేశాల నుంచి వలసలను పర్మనెంట్​గా నిలిపివేస్తాం. బైడెన్ కాలంలో ఆటో పెన్​సంతకంతో వచ్చిన లక్షలాది మందిని దేశం నుంచి తరిమేస్తాం. అమెరికాకు ఉపయోగం లేని వాళ్లు, దేశాన్ని ప్రేమించలేని వాళ్లకు ఇక్కడ ఉండే అర్హత లేదు. అలాంటివాళ్లని కూడా పంపేస్తాం. పౌరసత్వం లేని వాళ్లకు ప్రభుత్వం నుంచి వచ్చే అన్ని  సబ్సిడీలు, ఫెడరల్ బెనిఫిట్స్​ పూర్తిగా ఆపేస్తాం. దేశంలో గొడవలు సృష్టించే వారిని, దేశ భద్రతకు ముప్పుగా మారే వారిని దేశం నుంచి బహిష్కరిస్తాం. చట్టవిరుద్ధమైన, అల్లరు సృష్టించే జనాభా పెరుగుదలని ఆపాలంటే రివర్స్ మైగ్రేషన్ తో మాత్రమే సాధ్యం” అని పేర్కొన్నారు.  

ఆంక్షలు.. ఈ దేశాలపైనే..

మొత్తం 19 దేశాల నుంచి ​వలసలను ట్రంప్​ రద్దు చేశారు. ఆ జాబితాలో అఫ్గానిస్థాన్, మయన్మార్, బురుండి, చాద్, కాంగో, క్యూబా, ఈక్వటోరియల్ గినియా, ఎరిట్రియా, హైతీ, ఇరాన్, లావోస్, లిబియా, సియెర్రా లియోన్, సోమాలియా, సూడాన్, టోగో, తుర్కుమెనిస్తాన్, వెనెజులా, యెమెన్ ఉన్నాయి. ఈ ఏడాది జూన్ లోనే ఈ దేశాలపై ట్రంప్​ ట్రావెల్​ బ్యాన్​ విధించారు.  కాగా, అఫ్గాన్ తో పాటు 18 దేశాల గ్రీన్ కార్డ్ హోల్డర్ ల ఇమ్మిగ్రేషన్ స్థితిని కూడా రివ్యూ చేయనున్నారు.