సింగూరు ఖాళీ.. పంపింగ్ తప్పదు మరి!

• 60 ఏండ్ల కిందిది కావడంతో రిపేర్లు చేయాలన్న ఎక్స్​పర్ట్స్​ 
• స్పిల్​ వేలో పగుళ్లతో సమస్య 
• 2 నెలల నుంచి నీళ్లు వదిలేస్తున్న ఇరిగేషన్​
• ఉన్నవి 6.550 టీఎంసీలు మాత్రమే  
• మరో 12 అడుగులు తగ్గితే పంపింగే..

హైదరాబాద్​సిటీ, వెలుగు: నగరానికి తాగునీరందిస్తున్న సింగూరు జలాశయంలో నీటిమట్టం పూర్తిగా తగ్గిపోయింది. దీంతో పంపింగ్ ద్వారా నీటిని తెచ్చేందుకు వాటర్​బోర్డు ఏర్పాట్లు చేస్తోంది. జంటనగరాలకు వివిధ రిజర్వాయర్ల నుంచి 580 ఎంజీడీల నీళ్లు వస్తుండగా..సింగూరు నుంచే 70 ఎంజీడీలు తీసుకువస్తున్నారు. ఈ జలాశయం పూర్తి కెపాసిటీ 29.917 టీఎంసీలు కాగా, గత ఏడాది ఈ టైంకు 19.232 టీఎంసీల నీళ్లు ఉండె.. కానీ, రిపేర్లు చేయాల్సిన అవసరం ఉండడంతో రెండు నెలల నుంచి ఇరిగేషన్​అధికారులు ఖాళీ చేస్తున్నారు. హైదరాబాద్​తాగునీటి అవసరాల కోసం 6.550 టీఎంసీలను ఉంచారు. మరికొద్ది రోజుల్లో 4 టీఎంసీలకు చేరుకుంటే పంపింగ్​చేయాల్సిన పరిస్థితి ఉంటుంది.  

ఈ నెలాఖరు నుంచే..

సింగూరు డ్యామ్​నిర్మించి 60 ఏండ్లు దాటిన నేపథ్యంలో కొంతమేర శిథిలావస్థకు చేరుకుంది. దీంతో పూర్తి కెపాసిటీ నీళ్లు నిల్వ చేసే పరిస్థితి లేదు. అంతేగాకుండా డ్యామ్​నుంచి నీరు పారే స్పిల్​వేలో పగుళ్లు రావడం, చాలా ఏండ్లుగా రిపేర్లు చేయక పోవడంతో ప్రమాదకర స్థితికి చేరుకుంది. నిపుణుల కమిటీ కూడా రిపేర్లు చేయాలని స్పష్టం చేయడంతో ఇరిగేషన్​అధికారులు డ్యామ్​ను ఖాళీ చేస్తున్నారు. 

వ్యవసాయ అవసరాలకు నీటిని విడుదల చేస్తున్నారు. గత ఏడాది ఇదే సమయానికి 19.230 టీఎంసీలుండగా, ఇప్పుడు 6.550 టీఎంసీలు మాత్రమే ఉన్నాయి. ప్రస్తుతం సిటీ డ్రింకింగ్​వాటర్​కోసం రోజూ 70 ఎంజీడీలు తీసుకువస్తున్నారు. మరో12 అడుగులు తగ్గితే పంపింగ్​చేయాల్సి ఉంటుందని వాటర్​బోర్డు అధికారులు చెప్తున్నారు. తమ అంచనా ప్రకారం నెలాఖరులోపే పంపింగ్​మొదలవుతుందంటున్నారు. సింగూరులో ఇప్పుడన్న నీళ్లు జూన్​ వరకూ సరిపోయే విధంగానే ఉన్నాయని, ఒకవేళ సకాలంలో వర్షాలు కురవకపోతే తిప్పలు తప్పవంటున్నారు.  

రిపేర్లలో ఆలస్యం..

సింగూరు డ్యామ్​రిపేర్ల విషయంలో ఇరిగేషన్​అధికారులు కాలాయాపన చేస్తున్నారు. నిపుణుల కమిటీ ఫుల్​కెపాసిటీ నీళ్లను ఉంచితే ప్రమాదకరమని చెప్పడంతో నీళ్లను వేగంగా ఖాళీ చేస్తున్నారు. కానీ, రిపేర్ల విషయాన్ని సీరియస్​గా తీసుకోవడం లేదని తెలుస్తోంది. ఎందుకంటే ఇప్పటివరకూ మరమ్మతులకు సంబంధించి టెండర్లు కూడా పిలవలేదు. మరో రెండు మూడు నెలలు రిపేర్లు చేయకుండా వదిలేస్తే వర్షాలు కురిసినా నీళ్లను వదిలేయాల్సిన పరిస్థితే ఉంటుంది. సర్కారు స్పందించి తొందరగా రిపేర్లు చేయించాలని కోరుతున్నారు.