- గోదాములు కిరాయికి తీసుకున్నం
- అదనంగా 75 లారీల కేటాయించినట్టు వెల్లడి
కోల్బెల్ట్, వెలుగు: మంచిర్యాల జిల్లా చెన్నూరు నియోజకవర్గం పరిధిలోని రైతుల నుంచి ప్రతిగింజ కొంటామని మంత్రి వివేక్ వెంకటస్వామి హామీ ఇచ్చారు. వారం రోజుల్లో కొనుగోళ్లు పూర్తి చేసేందుకు చర్యలు స్పీడప్ చేసినట్టు చెప్పారు.
సోమవారం ఆయన నియోజకవర్గ రైతులనుద్దేశించి మాట్లాడారు. నియోజకవర్గంలో ఈ సారి అంచనాలకు మించి వరి దిగుబడి వచ్చిందన్నారు. వర్షాల నేపథ్యంలో ధాన్యం త్వరగా కొనుగోలు చేయాలని రైతులు కోరుతున్నారని, ఆ మేరకు ఏర్పాట్లు చేస్తున్నామన్నారు.
ధాన్యం నిల్వ చేసేందుకు చెన్నూరు, పెద్దపల్లిలో గోదాములు కిరాయికి తీసుకున్నామని, హమాలీల సంఖ్యను కూడా పెంచామని చెప్పారు. ధాన్యం తరలించేందుకు అదనంగా 75 లారీలను ఏర్పాటు చేశామన్నారు.
మంచిర్యాల జిల్లా కలెక్టర్ కుమార్ దీపక్, అధికారులు కొనుగోలు ప్రక్రియను ఎప్పటికప్పుడు పర్యవేక్షిస్తున్నారన్నారు. వారం రోజుల్లోగా మద్దతు ధరతో రైతుల వద్ద ఉన్న ధాన్యం మొత్తాన్ని కొంటామని భరోసా కల్పించారు.
