న్యూయార్క్: అమెరికా ప్రెసిడెంట్ జో బైడెన్ మరోసారి వింతగా ప్రవర్తించారు. స్టేజీపై ఆయన కొన్ని క్షణాలపాటు ఫ్రీజ్ అయిపోయారు. కొద్దిసేపు ఎటూ కదలకుండా అలాగే నిల్చుండిపోయారు. ఇది గమనించిన అమెరికా మాజీ ప్రెసిడెంట్ బరాక్ ఒబామా వెంటనే బైడెన్ చెయ్యిపట్టుకొని అక్కడినుంచి తీసుకెళ్లారు. లాస్ ఏంజిలిస్లో శనివారం డెమొక్రటిక్ పార్టీ ఆధ్వర్యంలో నిర్వహించిన ఫండ్ రైజింగ్
కార్యక్రమంలో ఈ ఘటన జరిగింది. ఇందుకు సంబంధించిన వీడియో సోషల్ మీడియాలో వైరల్ అవుతోంది. ఇటీవలి ఇటలీలో జరిగిన జీ7 సమిట్లోనూ బైడెన్ వింతగా ప్రవర్తించారు. జీ7 గ్రూప్ సభ్యులందరూ ఫొటో దిగేందుకు ఒకచోట చేరగా.. బైడెన్ మాత్రం వారికి దూరంగా వెళ్లారు. ఇటలీ ప్రధాని జార్జియా మెలోనీ గమనించి, ఆయనను వెనక్కి తీసుకొచ్చారు. కాగా, ఈ ఘటనలతో అమెరికా అధ్యక్షుడిగా పోటీలో ఉన్న 81 ఏండ్ల జో బైడెన్ ఫిటెనెస్పై విమర్శలు వ్యక్తమవుతున్నాయి.
