హైదరాబాద్: నార్సింగ్ పోలీస్ స్టేషన్ పరిధిలోని కోకాపేట్లో దారుణం జరిగింది. భర్తపై కూరగాయల కత్తితో దాడి చేసి హత్య చేసింది భార్య. పోలీసుల వివరాల ప్రకారం.. అస్సాంకు చెందిన కృష్ణ జ్యోతి బోరా, భరత్ బోరా భార్యాభర్తలు. ఉపాధి కోసం హైదరాబాద్ వచ్చారు. కోకాపేట్లో కార్మికులుగా పని చేస్తూ జీవనం సాగిస్తున్నారు. ఈ క్రమంలో గురువారం (సెప్టెంబర్ 18) రాత్రి భార్యాభర్తల మధ్య గొడవ జరిగింది.
తీవ్ర ఆగ్రహానికి గురైన కృష్ణ జ్యోతి భర్తపై కూరగాయల కత్తితో విచక్షణరహితంగా దాడి చేసింది. అపస్మారక స్థితిలోకి వెళ్లిన భరత్ను స్థానికులు ఆసుపత్రికి తరలించారు. తీవ్రంగా గాయపడటంతో చికిత్స పొందుతూ భరత్ మృతి చెందాడు. మృతుడి కుటుంబ సభ్యుల ఫిర్యాదు మేరకు కృష్ణ జ్యోతిపై కేసు నమోదు చేసి అరెస్ట్ చేశారు పోలీసులు. తాగుడికి బానిసై గత కొంతకాలంగా వేధిస్తున్నాడని.. వేధింపులు తాళలేక ఈ పని చేసినట్లు జ్యోతి పోలీసులకు వెల్లడించింది.
