- అదనపు కట్నం కోసం ఇంటి నుంచి గెంటేశారని ఆవేదన
ఘట్ కేసర్, వెలుగు: అదనపు కట్నం తీసుకురాలేదని ఏడాదిగా భర్త తనను ఇంట్లోకి రానవ్వడం లేదని ఓ మహిళ వాపోయింది. శనివారం ఘట్కేసర్మున్సిపాలిటీ ఎన్ఎఫ్ సీ నగర్ లోని భర్త ఇంటి ముందు బైఠాయించి నిరసనకు దిగింది. వివరాల్లోకి వెళ్తే.. ఎన్ఎఫ్సీ నగర్కు చెందిన రామిడి ప్రతాపరెడ్డి, బుచ్చమ్మ కొడుకు విష్ణువర్థన్ రెడ్డి సాఫ్ట్వేర్ఉద్యోగి. ఇతనికి యాదాద్రి భువనగిరి జిల్లా బీబీనగర్ మండలం బ్రాహ్మణపల్లికి చెందిన సురకంటి భూపాల్ రెడ్డి, బాలమణి కూతురు రాధికతో 2020 నవంబర్లో వివాహం జరిగింది.
రెండేండ్ల కూతురు ఉంది. విష్ణువర్థన్రెడ్డి పెండ్లప్పుడు కట్నం కింద అత్తమామల నుంచి అర ఎకరం పొలం, 40 తులాల బంగారం, కిలో వెండి, రూ.10 లక్షలు క్యాష్తీసుకున్నాడు. అయితే ఏడాది కింద అదనపు కట్నం తేవాలని భార్యను పుట్టింటికి పంపించేశాడు. అప్పటి నుంచి తిరిగి అత్తింటికి రానివ్వడం లేదు. పలుమార్లు పెద్దల సమక్షంలో పంచాయితీ పెట్టినా విష్ణువర్థన్రెడ్డి హాజరుకాలేదు.
దీంతో న్యాయం కావాలని కోరుతూ రాధిక శనివారం తల్లిదండ్రులతో కలిసి ఎన్ఎఫ్సీనగర్లోని భర్త ఇంటి ముందు బైఠాయించి నిరసనకు దిగింది. తన భర్త మరో యువతితో వివాహేతర సంబంధం కొనసాగిస్తున్నాడని, తనను వదిలించుకునే ప్రయత్నం చేస్తున్నాడని ఆరోపించింది. విచారణ జరిపి న్యాయం చేయాలని కోరింది.
