ఫుట్‌పాత్ పై నడుచుకుంటూ వెళ్తుండగా కారు ఢీకొట్టడంతో మహిళ మృతి చెందిన ఘటన మంగళూరులో చోటుచేసుకుంది. 2023, అక్టోబర్ 19వ తేదీ బుధవారం కర్నాటక మంగళూరులోని లేడీహిల్ సమీపంలో వేగంగా దూసుకొచ్చిన ఓ కారు అదుపుతప్పి ఫుట్‌పాత్ పై నడుచుకుంటూ వెళ్తున్న పాదచారులను ఢీకొట్టింది. కారును ఆపకుండా అక్కడి నుంచి డ్రైవర్ పరారయ్యాడు.
ఈ ప్రమాదంలో ఓ మహిళ అక్కడికక్కడే ప్రాణాలు కోల్పోగా.. మరో నలుగురు గాయపడ్డారు. సమాచారం అందుకున్న పోలీసులు వెంటనే సంఘటనాస్థలానికి చేరుకుని గాయపడిన వారిని చికిత్స నిమిత్తం ఆస్పత్రికి తరలించారు. మృతురాలిని 23 ఏళ్ల రూపశ్రీగా పోలీసులు గుర్తించారు. ఈ ఘటనపై కేసు నమోదు చేసిన పోలీసులు సీసీటీవీ ఫుటేజీ ఆధారంగా నిందితుడిని పట్టుకునేందుకు ప్రయత్నిస్తున్నారు.
