భద్రాద్రికొత్తగూడెం, వెలుగు: తమ భూమిని కబ్జా చేసిన వారికి ఆఫీసర్లు సహకరిస్తూ తనకు న్యాయం చేయడం లేదంటూ ఓ గిరిజన మహిళ కొత్తగూడెంలో రోడ్డుపై పడుకుని నిరసన వ్యక్తం చేసింది. పట్టణంలోని పోస్టాఫీస్సెంటర్లో ఆందోళన చేయడంతో ట్రాఫిక్ స్తంభించిపోయింది. దీంతో పోలీసులు ఆమెను రోడ్డుపై నుంచి లేపేందుకు తంటాలు పడాల్సి వచ్చింది. బలవంతగా తీసుకుపోవడానికి ప్రయత్నించగా తల కొట్టుకొని చస్తానంటూ బెదిరించింది. దీంతో ఎలాగో బుజ్జగించి ఆమె భర్త సాయంతో పక్కకు తీసుకువెళ్లారు.
బాధిత మహిళ భానోత్ ప్రియాంక, ఆమె భర్త కృష్ణ, ఆమె తల్లి పద్మ, మరదలు బిందు కథనం ప్రకారం...చుంచుపల్లి మండలం చుంచుపల్లి తండాకు చెందిన ప్రియాంకకు సంబంధించిన రెండున్నర ఎకరాల్లో ఎకరం భూమిని 2022లో బంధువులైన భానోత్రాంబాబు, హరికుమార్, రమేశ్లకు అమ్మారు. మిగిలిన భూమిని కూడా వారికే అమ్ముతామని చెప్పి సగం డబ్బులు తీసుకున్నారు. గడువులోగా మిగిలిన డబ్బులు ఇవ్వకుండా, తెలియకుండానే రెండున్నర ఎకరాలకు పట్టా చేయించుకున్నారు.
విషయం తెలుసుకుని తహసీల్దార్ దగ్గరకు వెళ్తే పట్టించుకోలేదు. పైగా రాంబాబు, హరికుమార్, రమేశ్కలిసి గురువారం ప్రియాంక ఆమె భర్తపై దాడి చేశారు. దీనిపై చుంచుపల్లి పోలీస్స్టేషన్లో కంప్లయింట్ఇస్తే స్పందించలేదు. రెవెన్యూ, పోలీస్ఆఫీసర్లు సహకరించకపోవడంతో చివరకు తప్పని పరిస్థితుల్లోనే రోడ్డుపై పడుకొని నిరసన తెలపాల్సి వచ్చిందని బాధితురాలు వాపోయింది. ఒకవేళ తమకు న్యాయం చేయకపోతే కలెక్టరేట్ఎదుట ఆత్మహత్య చేసుకుంటామని హెచ్చరించింది. దీనిపై తహసీల్దార్కృష్ణను వివరణ కోరగా భూమికి కు సంబంధించి తన వద్దకు ఎవరూ రాలేదని చెప్పారు. విషయం తెలుసుకుంటే ఆ ల్యాండ్ కోర్టు గొడవలో ఉందని తెలిసిందన్నారు. శనివారం ఫీల్డ్ మీదికి వెళ్లి పూర్తిస్థాయి విచారణ జరుపుతామన్నారు.
