- కేసీఆర్తో మాట్లాడిస్తానంటే మీటింగ్కు వస్తా!
- గద్వాల సభకు ఆహ్వానించిన టెలీ కాలర్కు ఓటరు రిప్లై
- సోషల్ మీడియాలో ఆడియో వైరల్
గద్వాల, వెలుగు : తనను సీఎంకు కలిపించి సమస్యలు పరిష్కరిస్తానంటేనే సోమవారం గద్వాలలో జరగనున్న సభకు వస్తానని ఓ వ్యక్తి తనకు ఫోన్చేసిన టెలీకాలర్కు బదులిచ్చాడు. ఇప్పుడీ ఆడియో సోషల్మీడియాలో వైరల్గా మారింది. సీఎం కేసీఆర్ సోమవారం గద్వాల పర్యటనకు వస్తున్న నేపథ్యంలో ఎమ్మెల్యే బండ్ల కృష్ణ మోహన్ రెడ్డి ఆఫీసు నుంచి జనాలకు ఫోన్ కాల్స్ చేస్తూ సభకు రావాలని ఆహ్వానిస్తున్నారు. ఇందులో భాగంగా ఆదివారం మల్దకల్ మండలం ఎల్కూర్ గ్రామానికి చెందిన రంగన్నకు ఓ టెలీ కాలర్ ఫోన్ చేసింది.
‘సార్.. రేపు సీఎం కేసీఆర్ గద్వాలకు వస్తుండు.. మీరు మీటింగ్ కు రావాలి’ అని కోరింది. దీనికి రంగన్న ‘ గద్వాలకు కేసీఆర్ ఏం జేసిండు..ఆయన మాయమాటలతో అట్రాక్ట్ చేస్తుండు. నేను భూ సమస్యతో 8 ఏండ్ల నుంచి ఇబ్బంది పడుతున్నా. ఇప్పటికీ పరిష్కారం కాలే. ఏ పనులు అయితలేవు, మా సమస్యలన్నీ చెప్పుకునేందుకు సీఎం కేసీఆర్ ను కల్పిస్తానంటే చెప్పండి మీటింగుకు వస్తా’ అని సమాధానం ఇచ్చాడు. ‘ మీ నెంబర్ ఇచ్చి ఫోన్ చేయమంటే చేస్తున్నా. అంతే తప్ప నేను మీ సమస్య పరిష్కరించలేను’ అని టెలీ కాలర్ చెప్పింది. ‘మేడం ఇలాంటి మోసకారి దగ్గర మీరు పని చేయొద్దు.. వేరే పని చూసుకోండి’ అంటూ రంగన్న సలహా ఇచ్చాడు.