- జడ్పీ మీటింగ్లో చైర్మన్ విఠల్రావు
- సాదాసీదాగా జడ్పీ మీటింగ్
నిజామాబాద్, వెలుగు : జిల్లాలోని రైతులందరూ గత ప్రభుత్వం మంజూరు చేసిన రూ.లక్ష పంట రుణమాఫీ వర్తించేలా చర్యలు తీసుకోవాలని జడ్పీ మీటింగ్లో సభ్యులు తీర్మానించారు. బుధవారం జడ్పీ చైర్మన్ విఠల్రావు అధ్యక్షతన నిర్వహించిన సమావేశంలో పంట రుణమాఫీపై సభ్యులు ప్రశ్న లేవనెత్తగా లీడ్ బ్యాంక్ మేనేజర్ సత్యనారాయణ చొరత తీసుకోవాలని కోరారు. ఖరీఫ్లో 12 లక్షల మెట్రిక్ టన్నుల దిగుబడి రాగా 8 లక్షల టన్నులు కొనుగోలు చేయాలని నిర్ణయించామన్నారు.
అయితే రైతుల నుంచి కేవలం 4 లక్షల టన్నులు మాత్రమే కొన్నామని చైర్మన్ చెప్పారు. మద్దతు ధరకంటే రైస్మిల్లర్లు ఎక్కువ రేటు చెల్లించి కొనుగోలు చేయడంతో మెజారిటీ రైతులు అటే వెళ్లారని వివరించారు. వడ్ల కొనుగోళ్లకు సంబంధించి50,732 మంది రైతులకు 80 శాతం పేమెంట్ చేశామన్నారు. మిగితా డబ్బు వారంలో చెల్లిస్తామని సివిల్ సప్లై ఆఫీసర్ జగదీశ్ సభ్యుల ప్రశ్నకు ఆన్సర్ ఇచ్చారు. సీఎంఆర్ రైస్ కూడా 92 శాతం సేకరించామన్నారు. జిల్లాలోని 259 రేషన్ షాపుల ద్వారా ప్రతి నెలా 4,15,200 కార్డులకు బియ్యం అందిస్తున్నామని డీఎస్వో చంద్రప్రకాశ్ తెలిపారు.
కొత్త రేషన్ కార్డుల జారీపై అడిగిన ప్రశ్నకు గవర్నమెంట్ ఆదేశాల కోసం ఎదురు చూస్తున్నామన్నారు. పింఛన్ వయస్సు 57 యేండ్లకు తగ్గించిన నేపథ్యంలో ప్రతి ఒక్కరూ లాభం పొందేలా సర్కారుకు నివేదిక పంపాలని ఆఫీసర్లకు సభ్యులుసూచించారు. గ్రామాల్లో గోపాలమిత్రులను అపాయింట్ చేసుకునేటప్పుడు స్థానికులకు ప్రాధాన్యత ఇవ్వాలని వెటర్నరీ శాఖ అధికారులను కోరగా వారు అంగీకరించారు. గవర్నమెంట్ స్కూల్స్లో జరిగిన దొంగతనం ఘటనలను మీటింగ్లో కొందరు సభ్యులు లేవనెత్తారు.
నైట్ వాచ్మెన్లు, అటెండర్లను నియమించుకొని సామగ్రికి భద్రత కల్పించాలని డీఈవో దుర్గాప్రసాద్ కు జడ్పీ చైర్మన్ సూచించారు. సీజనల్ రోగాలపై వైద్య శాఖ సిబ్బందిని అలర్ట్ చేశామని డీఎంహెచ్వో సుదర్శనం తెలిపారు. ఏఎన్ఎంలు, ఆశా వర్కర్లతో సర్వే చేయించి ఇళ్లకే మందులు పంపాలని సభ్యులు సూచించారు. మీటింగ్లో అదనపు కలెక్టర్ చిత్రామిశ్రా, సీఈవో గోవింద్నాయక్ తదితరులు ఉన్నారు.
