హైదరాబాద్‌, వెలుగు: రాష్ట్రంలో మరోసారి కరోనా వ్యాక్సినేషన్ డ్రైవ్ చేపట్టాలని ప్రభుత్వం నిర్ణయించింది. నేటి నుంచి వచ్చే నెల చివరి వరకూ ఈ కార్యక్రమం నిర్వహించనున్నారు. ఇందులో భాగంగా హెల్త్ వర్కర్లు ప్రతీ ఇంటికి తిరిగి, వ్యాక్సిన్ వేసుకోని వాళ్లను గుర్తించి టీకా వేస్తారు. ఇందుకోసం ప్రతీ గ్రామానికి 2 టీంలు ఏర్పాటు చేస్తూ పబ్లిక్ హెల్త్ డైరెక్టర్ డాక్టర్ శ్రీనివాసరావు గురువారం ఉత్తర్వులు జారీ చేశారు. ఒక టీం.. గ్రామంలో ఇంటింటికీ తిరుగుతూ టీకా వేసుకోని వారిని గుర్తించి వ్యాక్సినేషన్ క్యాంపునకు తరలిస్తుంది. ఇంకో టీం గ్రామంలోని ఏదో ఒక చోట క్యాంపు పెట్టి టీకా వేస్తుంది. రాష్ట్రంలో 16.36 లక్షల మంది సెకండ్ డోసు వ్యాక్సిన్ తీసుకోవాల్సి ఉంది. 29.51 లక్షల మంది బూస్టర్ డోసుకు అర్హత పొందారు. 12 నుంచి 18 ఏండ్ల ఏజ్‌ గ్రూపు పిల్లల్లో 70,827 మంది కనీసం ఒక్క డోసు కూడా వేసుకోలేదు.
