భద్రాచలం,వెలుగు: భద్రాచలం వద్ద గోదావరి తీరానికి శుక్రవారం వినాయక విగ్రహాలు నిమజ్జనానికి తరలివచ్చాయి. తెలుగు రాష్ట్రాల నుంచి నిమజ్జనం కోసం విగ్రహాలను లారీలు, ట్రాక్టర్లలో తీసుకొచ్చారు. విజయవాడ–-జగదల్పూర్ హైవేలో అంబేద్కర్ సెంటర్ మీదుగా డిగ్రీ కాలేజీ వరకు చేరుకుని అక్కడ నుంచి సుభాష్నగర్ కరకట్ట మీదుగా స్నానఘట్టాల వద్దకు వాహనాలు చేరుకున్నాయి. క్రేన్ల సాయంతో విగ్రహాలను లాంచీల పైకి ఎక్కించి గోదావరిలో నిమజ్జనం చేశారు. అనంతరం భక్తులు రామయ్య దర్శనం కోసం బారులుతీరారు. అడిషనల్ కలెక్టర్ వెంకటేశ్వర్లు, ఏఎస్పీ రోహిత్రాజు, తహసీల్దార్ శ్రీనివాస్యాదవ్, సీఐ నాగరాజురెడ్డి, ఈవో వెంకటేశ్వర్లు, దేవస్థానం డీఈ రవీందర్ తదితరులు నిమజ్జనం సందర్భంగా ఇబ్బందులు కలగకుండా ఏర్పాట్లు చేశారు. శని,ఆదివారాల్లో ఎక్కువ సంఖ్యలో విగ్రహాలు వచ్చే అవకాశం ఉండడంతో అవసరమైన ఏర్పాట్లు చేస్తున్నారు.
వర్షంలోనే నిమజ్జనం
భద్రాద్రికొత్తగూడెం, వెలుగు:వినాయక నిమజ్జనం సందర్భంగా కొత్తగూడెంలోని గణేశ్టెంపుల్లో అర్చకులు ప్రత్యేక పూజలు నిర్వహించారు. టెంపుల్లో కొలువైన విజయ విఘ్నేశ్వరుడు బాలగణపతిగా ఆకట్టుకున్నాడు. ఇక్కడి గణపతి లడ్డూను వేలంపాటలో మనోహర్రావు రూ.52,516 దక్కించుకున్నారు. పట్టణంలోని వినాయక విగ్రహాలను వర్షంలోనే నిమజ్జనానికి తరలించారు. ఆటపాటలతో నిమజ్జన శోభాయాత్ర ఆకట్టుకుంది.
కోటిన్నర కరెన్సీతో అలంకరణ
పాల్వంచ,వెలుగు: పాల్వంచలోని రాంనగర్ తూర్పు కాపు సంఘం ఆధ్వర్యంలో ఏర్పాటు చేసిన వినాయక మండపంలో రూ.1.50 కోట్ల కరెన్సీ నోట్లతో వినాయకుడిని అలంకరించారు. సాయంత్రం నుంచి జోరువాన కురుస్తున్నా భక్తులు వినాయక మండపానికి తరలివచ్చి పూజలు చేశారు.
