- అందజేసిన రాష్ట్రపతి ద్రౌపది ముర్ము
- ఆర్ట్స్ అండ్ కల్చర్ కేటగిరీలో అవార్డు
న్యూఢిల్లీ, వెలుగు: రాష్ట్రానికి చెందిన గౌరవి రెడ్డి సోమవారం ఢిల్లీలో రాష్ట్రపతి ద్రౌపది ముర్ము చేతుల మీదుగా ప్రధానమంత్రి బాల పురస్కారం–2023 అవార్డు అందుకున్నారు. గౌరవి రెడ్డి.. అతి చిన్న వయసు (17 ఏండ్లు)లో ఇంటర్నేషనల్ డ్యాన్స్ కౌన్సిల్–2016కు నామినేట్ అయింది. ఆరు శాస్త్రీయ నృత్య శైలీలలో ఇంటర్నేషనల్ స్థాయిలో వివిధ వేదికలపై ఆమె ప్రదర్శనలు ఇచ్చింది. ఇందుకు గాను ఆర్ట్స్ అండ్ కల్చర్ విభాగంలో ఆమెకు ఈ అవార్డు దక్కింది. బాల పురస్కారం అవార్డు కింద సర్టిఫికెట్, మెడల్తో పాటూ లక్ష రూపాయల నగదు పురస్కారాన్ని రాష్ట్రపతి అందించారు. ఆంధ్రప్రదేశ్‌కు చెందిన ఇంటర్నేషనల్ చెస్ ప్లేయర్ కోలగట్ల మీనాక్షితో పాటు వివిధ కేటగిరీల్లో చిన్న వయసులోనే విశేష ప్రతిభ కనబర్చిన మొత్తం 11 మంది బాలలు 2023 సంవత్సరానికి ఈ పురస్కారాలు అందుకున్నారు.
పిల్లలే దేశానికి అమూల్యమైన నిధి: ప్రెసిడెంట్
పిల్లలు దేశానికి అమూల్యమైన నిధి అని రాష్ట్రపతి ద్రౌపది ముర్ము అన్నారు. సోమవారం ఢిల్లీలోని విజ్ఞాన్ భవన్లో బాల పురస్కారాలు అందజేసిన అనంతరం ఆమె మాట్లాడారు. పురస్కార గ్రహీతలను చూస్తుంటే సంతోషంగా ఉందన్నారు. వీరంతా సమాజ నిర్మాణంలో, దేశ చరిత్రలో నిలిచిపోయారని అన్నారు. ఈ కార్యక్రమంలో కేంద్ర శిశు సంక్షేమ శాఖ మంత్రి స్మృతి ఇరానీ, సహాయ మంత్రి మహేంద్ర పాల్గొన్నారు.
