క్రౌన్ ప్రిన్స్ మహ్మద్ బిన్ సల్మాన్ను పదవి నుంచి దించేయడానికి కుట్ర పన్నారనే ఆరోపణలతో సౌదీ అధికారులు ముగ్గురు యువరాజులను అదుపులోకి తీసుకున్నారు. ఇందులో సల్మాన్ సోదరుడు ప్రిన్స్ అహ్మద్ బిన్ అబ్దులాజిజ్ అల్సౌద్ తో పాటు మేనల్లుడు ప్రిన్స్ మహ్మద్ బిన్ నయీఫ్ కూడా ఉన్నారు. ప్రిన్స్ నయీఫ్ సోదరుడు ప్రిన్స్ నవాఫ్ బిన్ నయీఫ్ ను కూడా పోలీసులు అరెస్టు చేశారు. బ్లాక్ లాడ్ రాయల్ గార్డ్స్ శుక్రవారం ఈ ముగ్గురి ఇండ్లకు వెళ్లి, వారిని తీసుకెళ్లినట్లు అమెరికన్ పేపర్ వార్త రాసింది. దీనిపై స్పందించేందుకు సౌదీ అధికారులు నిరాకరించారు. కరోనా వైరస్ వ్యాప్తిని అడ్డుకునే ఉద్దేశంతో ఇస్లాం పవిత్ర స్థలాలకు వెళ్లే పర్యాటకుల సంఖ్యపై క్రౌన్ ప్రిన్స్ ఆంక్షలు విధించారు. వైరస్నియంత్రణ చర్యల్లో భాగంగానే ఈ నిర్ణయం తీసుకున్నప్పటికీ.. ఇది వివాదాస్పదంగా మారింది. దేశవ్యాప్తంగా దీనిపై వ్యతిరేకత వ్యక్తమైంది. ఈ క్రమంలోనే రాజకుటుంబంలో తిరుగుబాటు కుట్ర బయటపడడం, ముగ్గురు యువరాజుల అరెస్టు జరగడం సౌదీ వ్యాప్తంగా సంచలనం సృష్టించింది. అరెస్టైన వారిలో ఇద్దరు యువరాజులు ఒకప్పుడు సింహాసనం కోసం పోటీపడిన వారేనని సౌదీ రాయల్ కోర్టు పేర్కొంది. క్రౌన్ ప్రిన్స్ పై తిరుగుబాటు ఆరోపణలు రాయల్ కోర్టులో రుజువైతే.. ముగ్గురు యువరాజులకు జీవిత ఖైదు లేదా మరణశిక్ష పడే అవకాశం ఉందని అధికార వర్గాలు తెలిపాయి.
