శంషాబాద్, వెలుగు : పహాడీ షరీఫ్ సమీపంలోని మామిడిపల్లి వద్ద నిర్మాణంలో ఉన్న బిల్డింగ్స్లాబ్ ఆదివారం కూలిపోయింది. ఈ ఘటనలో ఇద్దరు కార్మికులు మృతి చెందగా మరో నలుగురు తీవ్రంగా గాయపడ్డారు. దాదాపు 20 మంది బిల్డింగ్ రెండవ అంతస్తులో స్లాబ్ పనులు చేస్తుండగా అకస్మాత్తుగా కూలిపోయింది. స్లాబ్ కూలిపోయి కింద అంతస్తులో ఉన్నవారిపై పడడంతో స్పాట్లోనే ఇద్దరు కార్మికులు జగదీష్ బిడిక(49) తిలక్ పత్(33) మృతి చెందారు.
ఈ ప్రమాదంలో గాయపడినవారిని సమీపంలోని ప్రైవేట్ హాస్పిటల్ కు తరలించారు. మృతి చెందిన కార్మికులు ఒడిశా, యూపీకి చెందినవారుగా పోలీసులు గుర్తించారు. మృతదేహాలను పోస్టుమార్టం నిమిత్తం ఉస్మానియా ఆసుపత్రికి తరలించారు. బిల్డింగ్యజమాని పైన కేసు నమోదు చేసి దర్యాప్తు చేస్తున్నట్లు పహాడీ షరీఫ్ పోలీసులు తెలిపారు.
