- 84వేల ధాన్యం బస్తాలు, 12.80 లక్షల గన్నీ బ్యాగులు దగ్ధం
- రూ.20 కోట్ల మేర ఆస్తి నష్టం
- ఘటనపై అనుమానాలు
పెబ్బేరు, వెలుగు : వనపర్తి జిల్లా పెబ్బేరులోని మార్కెట్యార్డు గోదాంలో సోమవారం సాయంత్రం మంటలు చెలరేగి 84 వేల ధాన్యం బస్తాలు, 12.80 లక్షల గన్నీ బ్యాగులు కాలిపోయాయి. ఈ ప్రమాదంపై అనుమానాలు వ్యక్తమవుతున్నాయి. మంటలంటుకోవడాన్ని చూసిన స్థానికులు అగ్నిమాపక శాఖ అధికారులకు చెప్పడంతో వారు వచ్చి మంటలు ఆర్పే ప్రయత్నం చేశారు. మంటల తీవ్రత ఎక్కువగా ఉండడంతో గద్వాల, జడ్చర్ల, ఆత్మకూర్ ఫైర్ స్టేషన్లకు సమాచారమిచ్చారు. వారు కూడా వచ్చి అర్ధరాత్రి వరకు శ్రమించి మంటలు ఆర్పారు.
ఈ ప్రమాదంలో గోదాంలో ముగ్గురు వ్యాపారులు నిల్వ చేసిన 84 వేల ధాన్యం బస్తాలతో పాటు 12.80 లక్షల గన్నీ బ్యాగులు అగ్నికి ఆహుతయ్యాయి. వీటి విలువ సుమారు రూ.20 కోట్ల వరకు ఉంటుందని అంచనా. సమాచారం అందుకున్న కలెక్టర్ తేజస్ నందలాల్ పవార్, అడిషనల్ కలెక్టర్ నాగేశ్, ఆర్డీవో పద్మావతి, పెబ్బేరు తహసీల్దార్లక్ష్మి, ఎస్ఐ హరిప్రసాద్రెడ్డి ఘటనా స్థలానికి చేరుకొని పరిస్థితిని సమీక్షించారు. ప్రమాదం ఎలా జరిగందన్న దానిపై విచారణ చేస్తామని అడిషనల్ కలెక్టర్ తెలిపారు. రాష్ట్ర ప్రణాళిక సంఘం ఉపాధ్యక్షుడు జి చిన్నారెడ్డి ఘటనా స్థలాన్ని పరిశీలించారు. ఎవరో కావాలనే నిప్పు పెట్టారనే అనుమానాలు వ్యక్తమవుతున్నాయి. డీసీసీ అధ్యక్షుడు రాజేంద్రప్రసాద్ యాదవ్ మాట్లాడుతూ ప్రమాదం గురించి సీఎం రేవంత్రెడ్డి దృష్టికి తీసుకెళ్తామని, బాధ్యులపై చర్యలు తీసుకోవాలని విజ్ఞప్తి చేస్తామన్నారు.
