హైదరాబాద్: టీఎస్ఐపాస్ విధానంతో ఎంతో మందికి ఉద్యోగాలు కల్పించామన్నారు టీఆర్ఎస్ పార్టీ వర్కింగ్ ప్రెసిడెంట్ కేటీఆర్. ప్రభుత్వ శాఖల్లో అవసరమైన ఖాళీలను భర్తీ చేస్తూనే.. టీఎస్ఐపాస్ విధానంతో ప్రైవేటు రంగంలో 14 లక్షలకు పైగా ఉద్యోగాలను కల్పించామన్నారు. మొత్తం 6 సంవత్సరాల్లో తెలంగాణ యువతకు ఈ ఉద్యోగాలు కల్పించామని.. ఓ వైపు ప్రైవేటు రంగంలో ఉద్యోగాల కల్పన చేపడుతూనే, ప్రభుత్వ శాఖల్లో ఉద్యోగాల భర్తీని అత్యంత పారదర్శకంగా తమ ప్రభుత్వం చేపట్టిందన్నారు. ఎలాంటి అవినీతి ఆరోపణలు లేకుండా ఉద్యోగాల భర్తీ ప్రక్రియను టీఆర్ఎస్ ప్రభుత్వం కొనసాగిస్తోందని తెలిపారు. గత ప్రభుత్వాల హయాంలో పబ్లిక్ సర్వీస్ కమిషన్ లో ఉద్యోగాల భర్తీ అంటేనే అత్యంత అవినీతిమయం అన్న అపప్రధ ఉండేదన్నారు. ఆంధ్ర ప్రదేశ్ పబ్లిక్ సర్వీస్ కమీషన్ అప్పట్లో అవినీతి పబ్లిక్ సర్వీస్ కమీషన్ గా పేరుపొందిందని తెలిపారు.
కాంగ్రెస్ హయాంలో ఉమ్మడి ఆంధ్రప్రదేశ్ లో భర్తీ చేసిన ఉద్యోగాల కన్న ఎక్కువ ఉద్యోగాలను తెలంగాణ పబ్లిక్ సర్వీస్ కమిషన్ ద్వారా తమ ప్రభుత్వం భర్తీ చేసిందని చెప్పారు. అత్యంత పారదర్శకంగా జరిగిన ఈ నియామక ప్రక్రియ గురించి టీఎస్పీఎస్సీ ద్వారా ఉద్యోగం పొందిన ఏ ఒక్క నిరుద్యోగి అడిగినా చెప్తారన్నరు. ఇదీ ఉద్యోగాల భర్తీపై మా ప్రభుత్వానికున్న చిత్తశుద్దికి నిదర్శనం అన్నారు.
ఏ ప్రభుత్వానికి అయినా ఉద్యోగాల కల్పన నిరంతర ప్రక్రియనే అని.. ఆమేరకు తాజాగా సీఎం కేసీఆర్ మరో 50 వేల ఉద్యోగాలను భర్తీ చేసేందుకు నిర్ణయం తీసుకున్నారని తెలిపారు. అందుకు అనుగుణంగా భర్తీ ప్రక్రియ కొనసాగుతుందన్న కేటీఆర్.. అయితే రాష్ట్రంలో ప్రస్తుతం ఉన్న ఎలక్షన్ కోడ్ ముగిసిన వెంటనే ఈ ఉద్యోగాల భర్తీ ప్రక్రియను మరింత వేగంగా పూర్తి చేస్తామనడంలో ఎవరికి సందేహం అక్కర్లేదన్నారు. మేం అధికారంలోకి వచ్చినప్పటి నుంచి యువతకు ఉద్యోగాల కల్పన విషయంలో గత ప్రభుత్వాల కంటే ఎక్కువ నిబద్దత, చిత్తుశుద్దితో పనిచేస్తున్నామన్నారు. తెలంగాణ రాష్ట్ర సమితికి యువత అండగా నిలవాలని విజ్ఞప్తి చేస్తున్నా అన్నారు. కొన్ని పార్టీలు, నాయకులు పనిగట్టుకొని చేసే అసత్య ప్రచారాల ప్రభావానికి లోను కాకుండా యువత ఆలోచించాలని కోరుతున్నాను అన్నారు కేటీఆర్.
సంబంధిత శాఖల వారీగా భర్తీ చేసిన ఉద్యోగాల వివరాలు
1. తెలంగాణ స్టేట్ పబ్లిక్ సర్వీస్ కమిషన్ – 30,594
2. తెలంగాణ స్టేట్ లెవల్ పోలీస్ రిక్రూట్మెంట్ బోర్డ్ -31,972
3. తెలంగాణ స్టేట్ రెసిడెన్షియల్ ఎడ్యుకేషనల్ ఇన్స్టిట్యూషన్స్ రిక్రూట్మెంట్ బోర్డు- 3,623
4. ప్రొఫెసర్ జయశంకర్ తెలంగాణ స్టేట్ అగ్రికల్చరల్ యూనివర్సిటీ – హైదరాబాద్ – 179
5. శ్రీ కొండా లక్ష్మణ్ బాపూజీ తెలంగాణ స్టేట్ హార్టికల్చర్ యూనివర్సిటీ – హైదరాబాద్- 80
6. డైరెక్టర్, మైనారిటీస్ వెల్ఫేర్ – 66
7. జూనియర్ పంచాయతీ సెక్రెటరీస్ – 9,355
8. డిపార్ట్మెంట్ అఫ్ ఆయుష్ – 171
9. టీఎస్ జెన్ కో- 856
10. టీఎస్ ఎన్పీడీసీఎల్ – 164
11. టిఎస్ ఎస్పిడిసిఎల్ – 201
12. టీఎస్ ట్రాన్స్ కో – 206
13. టిఎస్-ఆర్ టి సి- 4,768
14. సింగరేణి కాలరీస్ కంపెనీ లిమిటెడ్-12,500
15. జెన్కో, ట్రాన్స్ కో, ఎన్పీడీసీఎల్, ఎస్ పి డి సి ఎల్ – 6,648
16. విద్యుత్ శాఖలో కాంట్రాక్ట్ ఉద్యోగుల క్రమబద్ధీకరణ – 22,637
17. హైదరాబాద్ జలమండలి- 807
18. తెలంగాణ స్టేట్ కో-ఆపరేటివ్ అపెక్స్ బ్యాంక్ – 243
19. డిసిసిబిలు – 1,571
20. భర్తీ ప్రక్రియ తుదిదశలో ఉన్న ఉద్యోగాలు – 6,258
