ఆత్మకూరు, వెలుగు: క్రికెట్ బెట్టింగులతో అప్పుల పాలైన ఓ యువకుడు చివరికి తల్లిదండ్రులు కొనిచ్చిన బైక్ను కూడా కుదువ పెట్టాడు. చివరికి ఆ డబ్బులూ బెట్టింగ్లో పోగొట్టుకున్నాడు. ఈ విషయంలో తల్లిదండ్రులతో గొడవ జరగడంతో ఉరేసుకుని సూసైడ్ చేసుకున్నాడు. హనుమకొండ జిల్లా దామెర మండలం ఊరుగొండకు చెందిన సాంబారి నాగరాజు(23) మద్యానికి బానిసవ్వడమే కాకుండా ఈజీ మనీ కోసం క్రికెట్ బెట్టింగ్ చేస్తున్నాడు. గత సంవత్సరం స్నేహితుల దగ్గర రూ. లక్షన్నర అప్పుగా తీసుకుని బెట్టింగ్లో పోగొట్టుకున్నాడు. దీంతో తండ్రి ఆ అప్పులను తీర్చాడు. గత నెల నుంచి ఐపీఎల్ స్టార్ట్ కాగా మళ్లీ అప్పు చేసి బెట్టింగ్లో పెట్టాడు. తల్లిదండ్రులు కొనిచ్చిన పల్సర్ బైక్ ను కూడా డబ్బుల కోసం కుదువ పెట్టాడు. మంగళవారం తల్లిదండ్రుల దగ్గరకు వెళ్లి డబ్బులు ఇస్తే బండిని విడిపించుకుంటానని అడిగాడు. ఇప్పటికే చేసిన అప్పులు తీర్చామని, ఇక తమతో కాదని చెప్పడంతో కామ్గా వెళ్లిపోయాడు. రాత్రి నాగరాజు ఒక గదిలో పడుకోగా, మరొక రూమ్లో తల్లిదండ్రులు పడుకున్నారు. రెండో కొడుకు విఘ్నేశ్ స్లాబ్ పైన నిద్రించగా, వర్షం రావడంతో కిందకు వచ్చి రూమ్లోకి వెళ్లేందుకు నాగరాజును పిలిచాడు. అతడు తలుపు తీయకపోవడంతో పగలగొట్టి లోపలికి వెళ్లి చూడగా నాగరాజు ఫ్యాన్కు చీరతో ఉరివేసుకొని కనిపించాడు. తండ్రి రవీందర్ ఫిర్యాదు మేరకు ఎస్సై హరిప్రియ కేసు నమోదు చేసుకొని దర్యాప్తు చేస్తున్నారు.
