- యాదాద్రి, భద్రాద్రి పవర్ ప్లాంట్లలో సగం వాటా ఆయనదే..
- పార్లమెంట్ ఎన్నికల తర్వాత బీఆర్ఎస్ ఎమ్మెల్యేల్లో సగం మంది జైలుకు పోతరు..
- వచ్చే ఎలక్షన్లలో వాళ్లకు ఒక్కసీటు కూడా రాదు
నల్గొండ, వెలుగు : పవర్లేని మాజీ పవర్మంత్రి గుంతకండ్ల జగదీశ్ రెడ్డి జైలుకు పోవుడు ఖాయమని, కేసీఆర్కుటుంబం తర్వాత జైలుకు పోయే రెండో వ్యక్తి ఆయనే అని ఆర్అండ్బీ శాఖ మంత్రి కోమటిరెడ్డి వెంకటరెడ్డి అన్నారు. సోమవారం నల్గొండలో విలేకరులతో మాట్లాడుతూ యాదాద్రి థర్మల్పవర్ప్లాంట్పై సిట్టింగ్జడ్జితో విచారణ జరిపిస్తున్నామని, భద్రాద్రి పవర్ప్లాంట్లోనూ భారీ కుంభకోణం జరిగిందన్నారు. ఈ రెండింటిలో సగం వాటా కేసీఆర్కుటుంబానికి పోతే, ఇంకో సగం జగదీశ్రెడ్డికి పోయిందన్నారు. టూ వీలర్ కూడా లేని జగదీశ్రెడ్డికి షాబాద్మండలంలో 80 ఎకరాల్లో ఫాంహౌజ్ ఎలా వచ్చిందని, దాని విలువ రూ.3 వేల కోట్లు ఉంటుందన్నారు.
సొంత ఊరు నాగారంలో రూ.50 కోట్ల ఖరీదైన బిల్డింగ్ ఉందన్నారు. ఎన్టీఆర్హయాంలో మద్య నిషేధం అమల్లో ఉంటే దొంగతనంగా మిర్యాలగూడకు మద్యాన్ని తరలించి జైలు పాలైన చరిత్ర జగదీశ్రెడ్డిదన్నారు. ఇంకా ఆ కేసు ఎక్సైజ్డిపార్ట్మెంట్లో ఉందన్నారు. అలాంటి క్యారక్టర్ లేని వ్యక్తి తన గురించి మాట్లాడం సిగ్గుచేటన్నారు. పార్లమెంట్ఎన్నికలయ్యాక బీఆర్ఎస్లో ఒక్కరు కూడా మిగిలరన్నారు. 39 మంది ఎమ్మెల్యేల్లో పది మంది కూడా మిగలరని, సగం మంది జైలుకు పోవుడు ఖాయమన్నారు. వచ్చే ఎంపీ ఎన్నికల్లో బీఆర్ఎస్కు ఒక్క సీటు కూడా రావడం కష్టమన్నారు. వాళ్ల పార్టీలో బావబామ్మర్దుల కొట్లాట నడుస్తోందని, ఇంకో వైపు కవిత, సంతోష్మధ్య వార్జరుగుతోందన్నారు.
