- సింగరేణి వ్యాప్తంగా బొగ్గు బాయిల వద్ద ఆందోళన
- నల్లబ్యాడ్జీలతో నిరసనలు ధర్నాలు, దిష్టిబొమ్మల దహనాలు
- రాష్ట్రంలో అన్ని కోల్మైన్స్సింగరేణి సంస్థకే కేటాయించాలని డిమాండ్
భద్రాద్రికొత్తగూడెం, వెలుగు : బొగ్గు గనుల వేలంపై యూనియన్లు భగ్గుమన్నాయి. కేంద్రంలోని బీజేపీ ప్రభుత్వం కోల్మైన్స్విష యంలో అనుసరిస్తున్న విధానాలను నిరసిస్తూ సింగరేణివ్యాప్తంగా కార్మిక సంఘాలు శుక్రవారం నిరసన తెలిపాయి. తెలంగాణలోని నాలుగు కోల్ బ్లాక్లను సింగరేణికే అప్పగించాలంటూ కార్మిక సంఘాల నేతలు డిమాండ్ చేస్తూ బొగ్గు బాయిలపై నల్లబ్యాడ్జీలు పెట్టుకుని నిరసన తెలిపారు. కొత్తగూడెంలోని సింగరేణి హెడ్డాఫీస్ఎదుట ఏఐటీయూసీ, సీఐటీయూ ఆధ్వర్యంలో నిరసన తెలిపారు.
హెడ్డాఫీస్తో పాటు ఏరియా, సెంట్రల్ వర్క్షాప్, పలు డిపార్ట్మెంట్స్, మైన్స్ వద్ద కార్మికులు నల్ల బ్యాడ్జీలు పెట్టుకుని కేంద్రం తీరును నిరసించారు. ఏఐటీయూసీ, సీఐటీయూ లీడర్లు వంగా వెంకట్, ఎస్వి. రమణమూర్తి, క్రిష్టఫర్, అనంతలక్ష్మి, మల్లికార్జున్. మందా నర్సింహరావు, విజయగిరి శ్రీనివాస్, రాజారావు, లక్ష్మీనారాయణ పాల్గొన్నారు.
మంచిర్యాల జిల్లాలో..
కోల్బెల్ట్: 60 బొగ్గు బ్లాక్లను బహిరంగ వేలం ద్వారా ప్రైవేటు సంస్థలకు కేటాయించేందుకు కేంద్రం తీసుకొన్న నిర్ణయం వల్ల ప్రభుత్వ బొగ్గు పరిశ్రమలు నిర్వీర్యమయ్యే ప్రమాదముందని వివిధ కార్మిక సంఘాలు ఆరోపించాయి. మంచిర్యాల జిల్లా మందమర్రి, శ్రీరాంపూర్, బెల్లంపల్లి ఏరియాల్లోని అండర్గ్రౌండ్బొగ్గు గనులు, ఓపెన్కాస్ట్ మైన్లు, డిపార్ట్మెంట్లపై సింగరేణి గుర్తింపు సంఘం ఏఐటీయూసీ, ప్రాతినిధ్య సంఘం ఐఎన్టీయూసీ, సీఐటీయూ, హెచ్ఎంఎస్, టీబీజీకేఎస్, ఐఎఫ్టీయూ, ఏఐఎఫ్టీయూ తదితర సంఘాలు నిరసన తెలిపాయి.
సంఘాల లీడర్లు, కార్యకర్తలు, కార్మికులు నల్లబ్యాడ్జీలు ధరించారు. మందమర్రి ఏరియా కేకే-5 బొగ్గు గనిపై హెచ్ఎంఎస్, ఇతర కార్మిక సంఘాలు కేంద్ర ప్రభుత్వ దిష్టిబొమ్మను దహనం చేశాయి. సింగరేణి జీఎంలు, అధికారులకు వినతిపత్రాలు అందజేశారు. కార్మిక సంఘాల లీడర్లు అక్బర్అలీ, సలెంద్ర సత్యనారాయణ, దాగం మల్లేశ్, రియాజ్ అహ్మద్, టి.శ్రీనివాస్, వెంకటస్వామి, శంకర్రావు మాట్లాడుతూ రాష్ట్రంలోని శ్రావణపల్లి గనిని వేలం నుంచి తొలగించాలని, అన్ని గనులను బేషరతుగా సింగరేణికి కేటాయించాలన్నారు.
సింగరేణిని ప్రైవేట్ కంపెనీలకు అప్పగించేందుకే కేంద్రం కుట్రపూరితంగా బొగ్గు బ్లాక్ల వేలం ప్రక్రియను తీసుకువచ్చిందన్నారు. కేంద్రం నిర్ణయంతో ప్రభుత్వ రంగ బొగ్గు పరిశ్రమలు నిర్వీర్యమవుతాయన్నారు. బొగ్గు బ్లాక్లు ప్రైవేటు సంస్థల చేతుల్లోకి వెళ్తే కార్మిక హక్కులు, ఉద్యోగ భద్రత ఉండవన్నారు. కేంద్ర ప్రభుత్వం గుజరాత్ మినరల్ డెవలప్మెంట్ కార్పొరేషన్కు నేరుగా బొగ్గు బ్లాక్లను ఎలాగైతే అలాట్ చేసిందో, అదే విధంగా సింగరేణికి బొగ్గు బ్లాక్లు కేటాయించాలన్నారు. కేంద్రం దుర్మార్గంగా తలపెట్టిన వేలంలో పాల్గొనకుండా నేరుగా సింగరేణికే ఇప్పించేలా రాష్ట్ర ప్రభుత్వం ప్రయత్నించాలన్నారు. సింగరేణి బొగ్గు బ్లాక్లను వేలంలో ఉంచడాన్ని అడ్డుకోవాల్సిన కేంద్రమంత్రి కిషన్రెడ్డి ఏకంగా హైదారాబాద్ వేదికగా వేలం నిర్వహించాలనే నిర్ణయం తీసుకోవడం కుట్రలో భాగమన్నారు.
పెద్దపల్లి జిల్లా గోదావరిఖనిలో..
గోదావరిఖని : రామగుండం రీజియన్ పరిధిలోని గని కార్మికులు నల్ల బ్యాడ్జీలు ధరించి డ్యూటీలకు హాజరయ్యారు. పలువురు లీడర్లు మాట్లాడుతూ తెలంగాణలోని బొగ్గు గనులను సింగరేణికి మాత్రమే కేటాయించాలని డిమాండ్ చేశారు. వేలంలో సింగరేణి పాల్గొనవద్దని, పాల్గొంటే ప్రైవేటీకరణను అంగీకరించినట్టు అవుతుందన్నారు. సీఐటీయూ బ్రాంచ్ అధ్యక్ష, కార్యదర్శులు ఆరెపల్లి రాజమౌళి, మెండె శ్రీనివాస్, తోట నరహరి రావు, జేల్లా గజేంద్ర, దాసరి సురేశ్ పాల్గొన్నారు. అలాగే, సింగరేణి కార్మిక సంఘాల ఐక్య వేదిక సమావేశం గోదావరిఖనిలోని హెచ్ఎంఎస్ యూనియన్ ఆఫీస్లో జరిగింది.
జులై 3న హైదరాబాద్లోని సోమాజిగూడ ప్రెస్ క్లబ్లో మేధావులు, ట్రేడ్ యూనియన్ల లీడర్లతో రౌండ్ టేబుల్ సమావేశం నిర్వహించాలని, ఆ లోపు సింగరేణి వ్యాప్తంగా అన్ని గనులపై గేట్ మీటింగ్లు జరపాలని నిర్ణయించారు. సింగరేణి కార్మిక సంఘాల లీడర్లు రియాజ్ అహ్మద్, జె.నారాయణ, ఐ.కృష్ణ, ఇ.నరేశ్, కామెర గట్టయ్య, కుమారస్వామి, జి.రాములు, రామకృష్ణ, ఏడుకొండలు పాల్గొన్నారు.
