కామారెడ్డి, వెలుగు: కామారెడ్డి జిల్లా కేంద్రానికి చెందిన ఓ వ్యక్తి గురువారం పొలం వద్ద పనిచేస్తుండగా ఆకస్మాత్తుగా ఛాతిలో నొప్పి వచ్చి పడిపోయాడు. పోలీసులు సీపీఆర్ చేసి అతడి ప్రాణాలు కాపాడారు. సిరిసిల్ల రోడ్డులోని బ్రిడ్జి వద్ద కాసర్ల నర్సింలు (50) అనే వ్యక్తి పొలంలో ట్రాక్టర్తో దున్నుతున్నాడు. ఛాతిలో నొప్పిరావడంతో ట్రాక్టర్ సీట్లోనే పడిపోయాడు. అక్కడే ఉన్న వంశీ హైవేపై పెట్రోలింగ్ నిర్వహిస్తున్న పోలీసులకు సమాచారం ఇచ్చాడు.
పోలీసులు పొలంలోకి వెళ్లి నర్సింలుకు సీపీఆర్ చేశారు. కొద్దిసేపటికి ఆయన స్పృహలోకి రాగానే భుజాలపై రోడ్డుపై ఉన్న వెహికిల్ వరకు మోసుకొచ్చారు. జిల్లా హాస్పిటల్లో చేర్పించి, కుటుంబ సభ్యులకు సమాచారం ఇచ్చారు. సీపీఆర్ చేసి వ్యక్తి ప్రాణాలు కాపాడిన ఎస్ఐ భూమయ్య, కానిస్టేబుళ్లు సురేశ్, హుస్సేన్లను ఎస్పీ సింధూశర్మ అభినందించారు.
