వైజాగ్ డాక్టర్ సుధాకర్ మానసిక వైద్య శాల నుంచి డిశ్చార్జికి హైకోర్టు అనుమతి ఇచ్చింది. అయితే సీబీఐ విచారణకు సహకరించాలని ఆయనకు సూచించింది. ఆస్పత్రి సూపరిండెంట్ ను తెలియజేసి ఏ క్షణమైనా డిశ్చార్జ్ కావచ్చునని హైకోర్టు తన ఆదేశాలలో తెలిపింది.
కరోనాకు చికిత్స చేస్తున్న డాక్టర్లకు సౌకర్యాలు కల్పించడంలో ఏపీ సర్కార్ నిర్లక్ష్యంగా వ్యవహరిస్తున్నదని విమర్శలు చేసిన డాక్టర్ సుధాకర్ ను ప్రభుత్వం సస్పెండ్ చేసింది. ఆ తర్వాత మరో కేసులో సుధాకర్ ను పోలీసులు అరెస్టు చేసి ఆయన మానసిక స్థితి సరిగా లేదంటూ మానసిక చికిత్సాలయానికి తరలించారు. దీనిపై హైకోర్టు విచారణ చేపట్టి..కేసును సీబీఐకి అప్పగించింది. అయితే ఈ కేసులో సీబీఐ విచారణ కొనసాగుతోంది. సీబీఐ అధికారులు నర్సీపట్నం చేరుకుని మున్సిపల్ కమిషనర్ ను విచారించారు. అంతకు ముందు సుధాకర్ పని చేస్తున్న ఆస్పత్రికి వెళ్లి సుపరింటెండెంట్ ను వివరాలు అడిగి తెలుసుకున్నారు. అలాగే హాజరు పట్టీ పరిశీలించారు.
