భారత ఆర్మీ వేట మొదలుపెట్టింది. పాక్ ముష్కరుల ఏరివేతకు కసితో బరిలో దిగింది. పుల్వామా దాడి తర్వాత రగులుతున్న గుండెలతో ఉగ్రవాదుల ఊచకోతకు దూకింది. అక్రమంగా సరిహద్దు దాటి ఇండియా గడ్డపై అడుగుపెట్టిన ఏ ఒక్క టెర్రరిస్టునూ వదలకుండా మట్టుబెట్టేందుకు ఉరకలేస్తున్నారు వీర జవాన్లు.
ఈ రోజు ఉదయమే పాక్ ముష్కర మూకలపై ఆర్మీ తొలి పంజా పడింది. పుల్వామా దాడికి ప్రతీకారం తీర్చుకుంది. సీఆర్పీఎఫ్ కాన్వాయ్ పై ఆత్మాహుతికి పాల్పడిన ఉగ్రవాది ఆదిల్ ను వెనుకనుండి నడిపించినోడిని మట్టుబెట్టారు. పుల్వామా జిల్లాలోనే ఆ దాడి మాస్టర్ మైండ్ రషీద్ ఘాజీ నక్కి ఉన్నాడన్న సమాచారంతో ఆర్మీ, సీఆర్పీఎఫ్ జాయింట్ ఆపరేషన్ షురూ చేశాయి. అర్ధరాత్రి 2 గంటల సమయంలో కార్డన్ సెర్చ్ మొదలుపెట్టాయి. దాదాపు 10 గంటల ఆపరేషన్లో ఇద్దరు టెర్రరిస్టులను హతమార్చారు మన సైనికులు. ఈ ఎన్ కౌంటర్లో నలుగురు జవాన్లు అమరులవడం దేశాన్ని బాధిస్తోంది.
ఓ ప్రాంతంలో దాగిన ముష్కరులను మట్టుబెట్టారో లేదో.. అంతలోనే మరో ప్రాతంలో వేటకు దిగారు. సోఫియన్ జిల్లా క్రవోరా గ్రామంలో కార్డన్ సెర్చ్ మొదలు పెట్టారు వీర జవాన్లు. సరిహద్దు దాటి అక్రమంగా చొరబడిన ఏ ఒక్కడిని వదలొద్దన లక్ష్యంతో రంగంలోకి దిగారు. పాక్ లోని ఉగ్ర సంస్థలు ఆడించినట్లు ఆడే ప్రతివాడినీ అంతమొందించే పనిలో పడ్డారు.
