న్యూఢిల్లీ, వెలుగు: స్పైసెస్ బోర్డు సభ్యుడిగా నిజామాబాద్ ఎంపీ ధర్మపురి అర్వింద్ ఎన్నికయ్యారు. ఆయనతో పాటు మచిలీపట్నం ఎంపీ వల్లభనేని బాలశౌరి ఎన్నికైనట్లు లోక్ సభ బులెటిన్ విడుదల చేసింది. ఈ నెల 14న వీరి ఎన్నికను లోక్ సభ ఆమోదించినట్టు స్పష్టం చేసింది. కాగా, స్పైసెస్ బోర్డు మెంబర్గా ఎన్నిక కావడంపై అర్వింద్ సంతోషం వ్యక్తం చేశారు.
బోర్డు మెంబర్ గా నిజామాబాద్ పార్లమెంట్ సెగ్మెంట్లోని పసుపు రైతులకు మరింత సేవచేసే అవకాశం లభించిందన్నారు. పసుపు, మిర్చి రైతుల అభివృద్ధి, సంక్షేమమే ధ్యేయంగా కృషిచేస్తానని అన్నారు. తాను ఎంపీగా ఎన్నికైన 8 నెలల్లోనే మోడీ ప్రభుత్వం నిజామాబాద్ కేంద్రంగా " రీజినల్ ఆఫీస్ కం ఎక్స్టెన్షన్ సెంటర్ " మంజూరు చేసిందని తెలిపారు.
ఈ సెంటర్ ద్వారా స్పైసెస్ బోర్డు 2022–25 కాలానికి రూ. 30 కోట్ల బడ్జెట్ ను ఆమోదించిందన్నారు. 1986 నుంచి 2020 వరకు దాదాపు35 ఏండ్లలో రాని బడ్జెట్ ఈ మూడేండ్లలో నియోజకవర్గానికి తీసుకొచ్చినట్లు వివరించారు. ఈ బడ్జెట్ లో ఇప్పటికే రూ. 9 కోట్ల నిధులు విడుదల అయ్యాయని పేర్కొన్నారు. బోర్డు సభ్యుడిగా తన ఎన్నికకు సహకరించిన వారికి అర్వింద్ ధన్యవాదాలు తెలిపారు.
