ఉక్రెయిన్: రష్యా ఆర్మీ సపోర్ట్తో వాగ్నర్ ప్రైవేటు సైన్యం బఖ్ముత్ను నాశనం చేసిందని, అక్కడ ఏం మిగల్చలేదని ఉక్రెయిన్ ప్రెసిడెంట్ వ్లాదిమిర్ జెలెన్స్కీ మండిపడ్డారు. ప్రస్తుతానికి బఖ్ముత్ తమ మనసుల్లో మాత్రమే ఉందని వివరించారు. ఉక్రెయిన్లోని కీలక నగరమైన బఖ్ముత్ను స్వాధీనం చేసుకున్నట్లు ఆదివారం రష్యా డిఫెన్స్ మినిస్ట్రీ ప్రకటించడంపై జెలెన్స్కీ తీవ్రంగా స్పందించారు. జపాన్లోని హిరోషిమాలో జరుగుతున్న జీ7 సమిట్కు అమెరికా అధ్యక్షుడు జో బైడెన్తో కలిసి పాల్గొన్న జెలెన్ స్కీ ఈ సందర్భంగా మాట్లాడారు. ‘‘బఖ్ముత్లో ఏం మిగల్లేదు. వాగ్నర్ ప్రైవేట్ ఆర్మీ బఖముత్ను నేలమట్టం చేసింది. ఇప్పుడు అక్కడ ఏంలేదు” అని జెలెన్స్కీ అన్నారు.
ఉక్రెయిన్కు రూ.31 వేల కోట్ల సాయం
ఉక్రెయిన్కు జో బైడెన్ తాజాగా రూ.31,089 కోట్ల సాయం ప్రకటించారు. మందుగుడు సామగ్రి, ఆయుధాలతో పాటు వెహికల్స్ ఇచ్చేందుకు అంగీకరించారు. ఈ క్రమంలోనే జెలెన్ స్కీ కీలక వ్యాఖ్యలు చేశారు. ఎనిమిది నెలలుగా రష్యా ఆర్మీ, వాగ్నర్ ప్రైవేటు సైన్యంతో ఉక్రెయిన్ ఆర్మీ వీరోచితంగా పోరాడిందని అన్నారు. బఖ్ముత్ను స్వాధీనం చేసుకునేందుకు రష్యా చాలా కోల్పోవాల్సి వచ్చిందని తెలిపారు.
రష్యా ఆర్మీ, వాగ్నర్ సైన్యానికి పుతిన్ అభినందన.
బఖ్ముత్ను స్వాధీనం చేసుకోవడంపై రష్యా ఆర్మీ, వాగ్నర్ ప్రైవేట్ సైన్యాన్ని ఆ దేశ అధ్యక్షుడు పుతిన్ అభినందించారు. 8 నెలల పాటు సాగిన పోరు తర్వాత బఖ్ముత్ నగరాన్ని స్వాధీనం చేసుకోడంపై పుతిన్ హర్షం వ్యక్తంచేశారు. శనివారం మధ్యాహ్నమే సిటీ మొత్తం తమ అధీనంలోకి వచ్చిందని వెల్లడించారు. రష్యా ఆర్మీకి వాగ్నర్ ప్రైవేట్ సైన్యం ఎంతో సహకారం అందించిందన్నారు.