కాంగ్రెస్ పార్టీ ప్రతిష్టాత్మకంగా చేపట్టిన ‘భారత్ జోడో యాత్ర’ ఇటీవలే కర్ణాటకకు చేరుకుంది. పాదయాత్రకు ప్రాతినిథ్యం వహిస్తూ, ఉత్సాహంగా ముందుకు వెళ్తున్న కాంగ్రెస్ నేత రాహుల్ గాంధీ ఆదివారం మైసూర్ లో యాత్రను కొనసాగించారు. ఈ క్రమంలో ఓ బహిరంగ సభలో రాహుల్ ప్రసంగించారు. ఈ సమయంలో భారీ వర్షం వచ్చింది. అయినా జోరు వానను కూడా లెక్కచేయకుండా ఆయన ప్రసంగాన్ని కొనసాగించడం అందర్నీ ఆకట్టుకుంది. ఈ వర్షంలోనే పార్టీలో చేరికల గురించి, నేతలంతా కలిసి అభివాదం చేయడం వంటివన్నీ జరిగిపోయాయి. దీనికి సంబంధించిన ఓ వీడియోను రాహుల్ గాంధీ ట్విట్టర్ లో షేర్ చేశారు.
భారత్ ను ఏకం చేయడంలో మమ్మల్ని ఎవరూ ఆపలేరని ఈ బహిరంగ సభలో రాహుల్ గాంధీ అన్నారు. కన్యాకుమారి నుంచి కశ్మీర్ వరకు తాము చేపట్టిన భారత్ జోడో యాత్రను ఎవరూ ఆపలేరు అని నొక్కి చెప్పారు. అంతకుముందు ఖాదీ గ్రామోదయ కేంద్రంలో మహాత్మా గాంధీకి ఆయన నివాళులర్పించారు.సెప్టెంబర్ 29న కేరళలో పూర్తయిన ఈ యాత్ర.. ప్రస్తుతం కర్ణాటకలో కొనసాగుతోంది. మైసూర్ నుంచి ఈ యాత్రను ప్రారంభించగా... ఈ నెల 6న యాత్రలో సోనియా గాంధీ పాల్గొనే అవకాశం ఉన్నట్లు తెలుస్తోంది.
