రంగారెడ్డి కలెక్టరేట్, వెలుగు: ఓటర్లను ప్రలోభ పెట్టినా, భయభ్రాంతులకు గురిచేసినా సీ విజిల్ యాప్ ద్వారా ఎవరైనా ఫిర్యాదు చేయొచ్చని రంగారెడ్డి జిల్లా ఎన్నికల అధికారి, కలెక్టర్ భారతి హొళికేరి మంగళవారం ఓ ప్రకటనలో తెలిపారు. ఫిర్యాదు అందిన 100 నిమిషాల్లో సమస్యను పరిష్కరిస్తామన్నారు. ఆండ్రాయిడ్ మొబైల్ యూజర్లు ప్లే స్టోర్ యాప్ ద్వారా సీ విజిల్ యాప్ను డౌన్ లోడ్ చేసుకోవచ్చని ఆమె తెలిపారు.
సమస్యకు సంబంధించిన ఫొటోతో పాటు జరిగిన విషయాన్ని టైప్ చేసి పంపించాలన్నారు. దివ్యాంగుల కోసం కేంద్ర ఎన్నికల కమిషన్ సాక్ష్యం యాప్ను తీసుకొచ్చిందని కలెక్టర్ తెలిపారు. ప్లే స్టోర్, యాపిల్ స్టోర్ నుంచి డౌన్ లోడ్ చేసుకుని దివ్యాంగులు సాక్ష్యం యాప్ సేవలను పొందవచ్చని ఆమె పేర్కొన్నారు.
