ప్రతి ఏటా బిగ్బాస్ విజేత ఎవరో ముందే ఊహించడం ప్రేక్షకులకు అలవాటే. కానీ సీజన్-9లో మాత్రం చివరి నిమిషం వరకు ఉత్కంఠ కొనసాగింది. నెక్-అండ్-నెక్ పోటీలో తనూజను స్వల్ప ఓట్ల తేడాతో వెనక్కి నెట్టి కల్యాణ్ పడాల ట్రోఫీని ముద్దాడారు. తనూజ రన్నరప్గా నిలిచినప్పటికీ, కల్యాణ్ సాధించిన ఈ విజయం వెనుక ఒక అసాధారణ పోరాటం ఉంది.
అగ్నిపరీక్ష నుంచి హౌస్లోకి..
ఈ సీజన్ కోసం నిర్వహించిన 'అగ్నిపరీక్ష' అనే స్పెషల్ షో ద్వారా వేలాది మంది అప్లికేషన్లను వడపోసి కల్యాణ్ను ఎంపిక చేశారు. సీఆర్పీఎఫ్ (CRPF) జవాన్ అయిన కల్యాణ్కు సినిమాలంటే ప్రాణం. కానీ పేదరికం, ఆర్థిక ఇబ్బందుల వల్ల తన కలను పక్కన పెట్టి దేశ సేవలో చేరారు. అయితే, బిగ్బాస్ ఇచ్చిన అవకాశాన్ని ఒక యుద్ధంలా భావించి హౌస్లోకి అడుగుపెట్టారు.
మొదటి మూడు వారాలు.. ఒక నిశ్శబ్దం..!
షో ప్రారంభమైన మొదటి రెండు, మూడు వారాలు కల్యాణ్ ఎవరో కూడా ప్రేక్షకులకు సరిగ్గా తెలియదు. మిగిలిన సెలబ్రిటీల హడావిడిలో ఆయన నిశ్శబ్దంగా తన పని తాను చేసుకుపోయారు. కానీ మూడో వారంలో ప్రియ ఎలిమినేట్ అయిన తర్వాత కల్యాణ్లోని అసలు 'సైలెంట్ కిల్లర్' బయటకు వచ్చాడు. అప్పటి వరకు ఒక జవాన్లా క్రమశిక్షణతో ఉన్న వ్యక్తి, ఆటలోకి వచ్చేసరికి ఒక సింహంలా గర్జించడం మొదలుపెట్టారు.
వరుస రికార్డులు.. ఫస్ట్ ఫైనలిస్ట్..!
కల్యాణ్ ప్రయాణం గ్రాఫ్ ఎప్పుడూ కిందకు పడలేదు. ప్రతి వారం ఆయన ఓటింగ్ పెరుగుతూనే వచ్చింది. ఫ్యామిలీ వీక్ సమయంలో తన తండ్రి పట్ల ఆయన చూపిన ప్రేమ, తన గతాన్ని తలచుకుని భావోద్వేగానికి లోనైన తీరు ఫ్యామిలీ ఆడియన్స్ను కట్టిపడేసింది. అదే ఊపులో సీజన్ చివరి కెప్టెన్గా బాధ్యతలు చేపట్టి, ఈ సీజన్ మొదటి ఫైనలిస్ట్ (Ticket to Finale Winner) గా నిలిచి చరిత్ర సృష్టించారు.
ఆటలో రాజీ లేని పోరాటం
ఫిజికల్ టాస్క్లలో కల్యాణ్ ప్రదర్శన అమోఘం. తనకంటే శారీరకంగా బలవంతులైన వారితో తలపడేటప్పుడు ఆయన చూపిన తెగువ చూసి హోస్ట్ నాగార్జున సైతం ప్రశంసించారు. ఎక్కడా వెన్నుపోటు రాజకీయాలు చేయకుండా, గ్రూపిజంలో పడకుండా 'లోన్ వారియర్'గా పోరాడారు. ఎదుటివారు కించపరిచినా తన సహనాన్ని కోల్పోకుండా హుందాగా సమాధానమివ్వడం ఆయనలోని నాయకత్వ లక్షణాలను చాటిచెప్పింది.
గెలుపు మలుపు..
ఫినాలేలో సంజన, ఇమ్మాన్యుయేల్ నిష్క్రమణ తర్వాత.. డిమోన్ పవన్ రూ. 15 లక్షలు తీసుకుని తప్పుకోవడం కల్యాణ్కు కలిసొచ్చింది. చివరి పోరు తనూజ, కల్యాణ్ మధ్య జరగగా, తెలుగు ప్రజలు 'మన ఇంటి జవాన్' వైపు మొగ్గు చూపారు.
కల్యాణ్ పడాల విజయం ఒక వ్యక్తి గెలుపు మాత్రమే కాదు.. అది కష్టపడే ప్రతి సామాన్యుడి ఆశల విజయం. రూ. 35 లక్షల నగదు బహుమతి , బంగారు ట్రోఫీతో ఆయన తన కలలను సాకారం చేసుకున్నారు. కేవలం సెలబ్రిటీలే కాదు, నిజాయితీగా ఆడితే సామాన్యులు కూడా బిగ్బాస్ కింగ్ అవుతారని కల్యాణ్ నిరూపించారు. సామాన్యుడి అడుగు.. అసామాన్యం అని చాటుతూ కల్యాణ్ ప్రయాణం ముగిసింది.
