యాదాద్రి, వెలుగు: రాష్ట్రంలోని అవినీతి, అక్రమ, నియంతృత్వ కేసీఆర్ పాలనను కూకటివేళ్లతో పెకలిస్తామని, త్వరలోనే మోడీ, యోగి జోడీ తరహా పాలనను తెలంగాణ ప్రజలు చూస్తారని రాజ్యసభ సభ్యుడు, ఓబీసీ మోర్చా జాతీయ అధ్యక్షుడు కె.లక్ష్మణ్ అన్నారు. యూపీ నుంచి బుల్డోజర్ వస్తోందని, కేసీఆర్ దోచుకున్న అక్రమాస్తులను కూల్చేసి, స్వాధీనం చేసుకుంటామని స్పష్టం చేశారు. ఆదివారం యాదగిరిగుట్టలో లక్ష్మీ నర్సింహస్వామిని లక్ష్మణ్ దర్శించుకుని ప్రత్యేక పూజలు చేశారు. తర్వాత భువనగిరిలో ఓబీసీ మోర్చా రాష్ట్ర అధ్యక్షుడు ఆలె భాస్కర్రాజ్, బీజేపీ జిల్లా అధ్యక్షుడు పీవీ శ్యాంసుందర్రావు ఆధ్వర్యంలో జరిగిన ‘కుల వృత్తుల చైతన్య సదస్సు’లో ఆయన మాట్లాడారు. తనను రాజ్యసభకు ఎంపిక చేయడంపై ప్రధాని మోడీకి కృతజ్ఞతలు తెలిపారు. తనకు దక్కిన గౌరవాన్ని పార్టీ కార్యకర్తలకు అంకితం ఇస్తున్నట్లు చెప్పారు.
అహ నా పెళ్లంట సినిమాలా కేసీఆర్ పాలన
కేసీఆర్ అత్యంత అవినీతిపరుడు, అబద్ధాలకోరని లక్ష్మణ్ ఆరోపించారు. అరచేతిలో వైకుంఠం చూపి రాష్ట్రాన్ని అప్పుల పాల్జేసి, చివరకు జీతాలు కూడా ఇవ్వలేని స్థాయికి తెచ్చారని మండిపడ్డారు. ‘‘కేసీఆర్ పాలన ‘అహ నా పెళ్లంట’సినిమాలా ఉంది. ఆ సినిమాలో కోడిని పైకప్పుకు కట్టిన కోటా శ్రీనివాసరావు దాన్ని చూస్తూ చికెన్తో భోజనం చేసినట్టుగా ఫీలవుతాడు. అట్లనే ఎర్రవల్లిలో ఇండ్లు కట్టిన కేసీఆర్, అందరికీ ఇండ్లు కట్టిస్తానని చెప్పి, ఓట్లు వేయించుకున్నాడు. కేసీఆర్ రెండోసారి గెలిచిన తర్వాత కూడు, గూడు, జాబు లేకుండా పోయాయి”అని అన్నారు. కేంద్రం పథకాలను చూపిస్తూ కేసీఆర్ సోకులు పడ్తున్నారని విమర్శించారు.
మరిన్ని వార్తల కోసం...
