న్యూఢిల్లీ: మనదేశంలోని కుటుంబాల వద్ద ఉన్న బంగారం నిల్వలు ప్రపంచంలోని టాప్–10 దేశాల కేంద్ర బ్యాంకుల నిల్వలను మించిపోయాయని అసోచామ్ వెల్లడించింది. దీని రిపోర్ట్ ప్రకారం.. మన ఇండ్లలో ఉన్న బంగారం విలువ ఐదు ట్రిలియన్ డాలర్లకు (దాదాపు రూ.462.25 లక్షల కోట్లు) చేరుకుంది. ఇది ప్రపంచంలోనే అతిపెద్ద ప్రైవేట్ సంపద నిల్వల్లో ఒకటిగా నిలిచింది.
ఈ బంగారం నిల్వల్లో కేవలం 2 శాతం నిధులు ఆర్థిక వ్యవస్థలోకి చేరితే దేశ వృద్ధి వేగంగా పెరుగుతుంది. 2047 నాటికి భారత జీడీపీ 34 ట్రిలియన్ డాలర్లకు చేరుతుందని అంచనా వేయగా, ఈ బంగారం తోడ్పాటుతో అది 40 ట్రిలియన్ డాలర్లకు పెరిగే అవకాశం ఉంది. ప్రస్తుతం ఈ సంపదలో ఎక్కువ భాగం ఆర్థిక వ్యవస్థ బయటే ఉంది. దీనిని ఉత్పాదక రంగాల్లోకి మళ్లించడానికి గోల్డ్ మానిటైజేషన్ పథకాలు అవసరమని రిపోర్ట్ పేర్కొంది. గోల్డ్ లోన్లు కూడా భారీగా పెరిగాయి. 2025 నవంబర్ నాటికి బంగారంపై రుణాల విలువ రూ.24.34 లక్షల కోట్లకు చేరింది.
