ఖమ్మం, వెలుగు: ఎంపీ బండి సంజయ్ని బీజేపీ రాష్ట్ర అధ్యక్ష పదవి నుంచి తొలగించడంపై ఆవేదన చెందుతూ ఓ బీజేపీ కార్యకర్త ఆత్మహత్యకు ప్రయత్నించాడు. ఖమ్మం అర్బన్ ఉపాధ్యక్షుడిగా పనిచేస్తున్న గజ్జల శ్రీనివాస్ మంగళవారం తన ఇంట్లో ఉరివేసుకొని ఆత్మహత్యాయత్నం చేశారు. ‘సంజయ్ని రాష్ట్ర అధ్యక్ష పదవి నుంచి తొలగించడం బాధ కలిగించింది’ అంటూ సూసైడ్ లెటర్ రాశాడు. వెంటనే కుటుంబ సభ్యులు గుర్తించి శ్రీనివాస్ను ఖమ్మంలోని ఒక ప్రైవేట్ ఆస్పత్రికి తరలించారు. ప్రస్తుతం శ్రీనివాస్ ఆసుపత్రిలో చికిత్స పొందుతున్నాడు. ఆయనకు ప్రాణాపాయం లేదని డాక్టర్లు చెబుతున్నారు. విషయం తెలుసుకున్న బీజేపీ జాతీయ నాయకుడు, తమిళనాడు రాష్ట్ర సహా ఇన్చార్జ్ పొంగులేటి సుధాకర్ రెడ్డి, శ్రీనివాస్ కుటుంబ సభ్యులతో మాట్లాడి ధైర్యం చెప్పారు. డాక్టర్లతో మాట్లాడి శ్రీనివాస ఆరోగ్య పరిస్థితి గురించి ఆరా తీశారు. జిల్లా బీజేపీ అధ్యక్షుడు గల్లా సత్యనారాయణ ఇతర నేతలు ఆసుపత్రిలో శ్రీనివాస్ను పరామర్శించారు.
