- రాష్ట్రం మొత్తాన్ని హైదరాబాద్లో కలిపేటట్టున్నరు: కేపీ వివేకానంద్
హైదరాబాద్, వెలుగు: రాజకీయ ప్రయోజనాల కోసమే 27 మున్సిపాలిటీలను గ్రేటర్ హైదరాబాద్ లో విలీనం చేస్తున్నారని బీఆర్ఎస్ఎమ్మెల్యే కేపీ వివేకానంద ఆరోపించారు. ఎలాంటి అధ్యయనం చేయకుండా అశాస్త్రీయంగా విలీన నిర్ణయం తీసుకున్నారని మండిపడ్డారు. మున్సిపాలిటీల విలీనంపై వెంటనే అఖిలపక్ష సమావేశం నిర్వహించాలని డిమాండ్ చేశారు. బుధవారం ఆయన తెలంగాణ భవన్లో మీడియాతో మాట్లాడారు.
ప్రజాభిప్రాయం, ఎమ్మెల్యేలు, ఎంపీల అభిప్రాయం తీసుకోకుండా గ్రేటర్ లో కలపడం అన్యాయమన్నారు. విలీనం చేసిన వెంటనే పన్నులు, రిజిస్ట్రేషన్ చార్జీలను పెంచుతారన్నారు. తెలంగాణ మొత్తాన్ని హైదరాబాద్లో కలిపేందుకు రేవంత్ రెడ్డి ప్రయత్నిస్తున్నట్టున్నారని విమర్శించారు. పెట్టుబడిదారుల కోసమే రేవంత్ రెడ్డి పనిచేస్తున్నారని వివేకానంద ఫైర్ అయ్యారు.
