- బీసీ రిజర్వేషన్ల విషయంలో.. మా చిత్తశుద్ధిని శంకించాల్సిన పని లేదు
- పదేండ్లు అధికారంలో ఉండి బీసీలకు ఒరగబెట్టిందేమీ లేదు: మంత్రి సీతక్క
కామారెడ్డి, వెలుగు: స్థానిక సంస్థల్లో బీసీలకు 42 శాతం రిజర్వేషన్లు ఇచ్చే విషయంలో చిత్తశుద్ధి ఉందని, తమ ప్రయత్నాన్ని ఎవరూ శంకించాల్సిన అవసరం లేదని మంత్రి సీతక్క తెలిపారు. శుక్రవారం కామారెడ్డిలో రాష్ట్ర ప్రభుత్వ సలహాదారు షబ్బీర్ అలీతో కలిసి మీడియాతో మాట్లాడారు. రిజర్వేషన్లకు సంబంధించిన ప్రక్రియను పూర్తి చేసి కేంద్రానికి పంపామని, దీనిపై కేంద్రంపై ఒత్తిడి తీసుకొస్తామని తెలిపారు.
బీసీల గురించి బీఆర్ఎస్ వాళ్లకు మాట్లాడే అర్హత లేదని, పదేండ్లు అధికారంలో ఉండి బీసీలకు ఒరగబెట్టిందేమీ లేదని విమర్శించారు. బీసీలకు 42 శాతం రిజర్వేషన్లు ఇవ్వడం బీఆర్ఎస్ వాళ్లకు నచ్చడం లేదన్నారు. ఈ విషయంలో కేంద్రంపై ఒత్తిడి చేయకపోగా సన్నాయి నొక్కులు నొక్కుతున్నారని విమర్శించారు. ఉద్యోగాల భర్తీకి నోటిఫికేషన్లు ఇచ్చి పక్కనబెడుతూ వచ్చిందని, గ్రూప్–1 విషయంలో గత ప్రభుత్వం విఫలమైందన్నారు.
సోషల్ మీడియాను, వాళ్ల పేపర్లు, టీవీలను అడ్డం పెట్టుకొని అబద్ధాలను నమ్మించే ప్రయత్నం చేస్తున్నారని విమర్శించారు. నిరుద్యోగులకు న్యాయం చేయాలన్నదే తమ ప్రభుత్వ లక్ష్యమన్నారు. ఇప్పటి వరకు 70 వేల ఉద్యోగాలు ఇచ్చామని, వాళ్లు పదేండ్లలో 80 వేలు కూడా ఇవ్వలేదన్నారు. గతంలో బీఆర్ఎస్లో చేరిన వాళ్ల గురించి కేటీఆర్ మాట్లాడాలని హితవు పలికారు. వాళ్ల పార్టీలోకొస్తే గొప్ప డీఎన్ఏనా అని ప్రశ్నించారు. అభివృద్ధి కోసమే బీఆర్ఎస్ ఎమ్మెల్యేలు కలిశారని పేర్కొన్నారు.
2014,2018 ఎన్నికల తరువాత కాంగ్రెస్, టీడీపీ, సీపీఐ, బీఎస్పీ నుంచి 40 మంది ఎమ్మెల్యేలను, వందలాది మంది ఎంపీటీసీలు, సర్పంచులు, ఇతర ప్రజాప్రతినిధులను చేర్చుకున్నారని
గుర్తు చేశారు.
