గోదావరిఖని, వెలుగు: రామగుండం ఫర్టిలైజర్స్ అండ్ కెమికల్స్ లిమిటెడ్(ఆర్ఎఫ్సీఎల్) ప్లాంట్లో ఈ ఆర్థిక సంవత్సరంలో ఏప్రిల్ నుంచి సెప్టెంబర్ వరకు ఆరు నెలల కాలంలో నిర్దేశించిన యూరియా ఉత్పత్తి టార్గెట్ను రీచ్ అయ్యామని సీజీఎంఉదయ్ రాజహంస తెలిపారు. మంగళవారం మీడియాకు వివరాలు వెల్లడించారు. ఆరు నెలల్లో 6 లక్షల మెట్రిక్ టన్నుల యూరియా ఉత్పత్తి లక్ష్యంగా నిర్ణయించగా, 6,17,600.43 మెట్రిక్ టన్నుల యూరియాను ఉత్పత్తి చేసినట్లు తెలిపారు.
ఇందులో తెలంగాణకు 2,16,036.45 మెట్రిక్ టన్నులు, ఏపీకి56,481.30 మెట్రిక్ టన్నులు, కర్నాటకకు 1,33,897.77 మెట్రిక్ టన్నులు, మహారాష్ట్రకు 66,436.92 మెట్రిక్ టన్నులు, చత్తీస్ఘడ్కు 43,869.06 మెట్రిక్ టన్నులు, తమిళనాడుకు 46,529.91 మెట్రిక్ టన్నులు, మధ్యప్రదేశ్కు 54,349.02 మెట్రిక్ టన్నుల యూరియా సప్లై చేశామని చెప్పారు. ఆర్ఎఫ్సీఎల్లో పూర్తి స్థాయి యూరియా ఉత్పత్తిని సాధించడంలో కీలకపాత్ర పోషించిన కార్మికులు, ఉద్యోగులు, ఆఫీసర్లను సీజీఎం అభినందించారు. దేశంలో ఎరువుల కొరతను తీర్చేందుకు ఆర్ఎఫ్సీఎల్ ప్లాంట్ తనవంతు పాత్ర పోషిస్తుందని తెలిపారు.
