కాంగ్రెస్ అగ్రనేత.. కాకా వెంకటస్వామి జయంతిని పురస్కరించుకుని రాష్ట్ర వ్యాప్తంగా నివాళులు అర్పిస్తున్నారు అభిమానులు. బాగ్ లింగంపల్లి అంబేద్కర్ విద్యా సంస్థల్లో జరిగిన వేడుకల్లో ఆయన కుమారుడు.. చెన్నూరు ఎమ్మెల్యే వివేక్ వెంకటస్వామి మాట్లాడుతూ... పేదలకు అండగా ఉండి ఎన్నో సేవా కార్యక్రమాలు చేశారన్నారు. అంబేద్కర్ విద్యా సంస్థల చైర్మన్ సరోజ వివేక్... కాకా విగ్రహానికి పూల మాల వేసి నివాళులు అర్పించారు. కాకా ఆశీర్వాదంతో అంబేద్కర్ కాలేజీని.. అప్పటి రాష్ట్రపతి వీవీ గిరి చేతుల మీదుగా ప్రారంభించామన్నారు. 50 ఏళ్లుగా లక్షన్నర మంది పేద విద్యార్థులకు విద్యనందించామన్నారు.
అంబేద్కర్ ఆశయాలను స్ఫూర్తిగా తీసుకుని... ఆ మహనీయుని అడుగు జాడల్లో నడుస్తూ.. ప్రతి ఒక్కరికి విద్యను అందించాలనే ఉద్దేశంతో అంబేద్కర్ విద్యా సంస్థలు స్థాపించామన్నారు. పేదలకు విద్యనందించేందుకు అంబేద్కర్ విద్యాసంస్థలు కీలకపాత్ర పోషిస్తున్నాయని.. యూనివర్శిటీ దిశగా అడుగులు వేస్తున్నామన్నారు. తమ సంస్థలకు న్యాక్ గుర్తింపు వచ్చిందన్నారు. అంబేద్కర్ అడుగుజాడల్లో నడుస్తూ,ప్రతి ఒక్కరికీ విద్య అందించే విధంగా.. కాక అంబేద్కర్ విద్య సంస్థలు స్థాపించారన్నారు. కాకా చేసిన సేవలను.. మంచి పనులను స్ఫూర్తిగా తీసుకుని తెలంగాణ వ్యాప్తంగా ప్రజలకు సేవ చేస్తామన్నారు. ఈ కార్యక్రమంలో కాకా విగ్రహానికి బెల్లంపల్లి ఎమ్మెల్యే గడ్డం వినోద్ కుమార్ పూలమాల వేసి.. నివాళులు అర్పించారు.
