న్యూఢిల్లీ: పది, పన్నెండో తరగతి బోర్డు పరీక్షల నిర్వహణ వ్యయం, జవాబు పత్రాల కొనుగోలు టెండర్ వివరాలను వెల్లడించాలని సెంట్రల్ బోర్డ్ ఆఫ్ సెకండరీ ఎడ్యుకేషన్(సీబీఎస్ఈ)ను కేంద్ర సమాచార కమిషన్ (సీఐసీ) ఆదేశించింది. ఆర్టీఐ పరిధిలోకి వచ్చే సమాచారాన్ని పాయింట్ల వారీగా దరఖాస్తుదారుడికి అందించాలని స్పష్టం చేసింది.
సమాచారం ఇవ్వడానికి నిరాకరిస్తూ గతంలో సీబీఎస్ఈ తీసుకున్న నిర్ణయాన్ని కమిషన్పక్కనబెట్టింది.2023–-24, 2024–-25 విద్యా సంవత్సరాల్లో వాడిన జవాబు పత్రాల నాణ్యత, పరిమాణం, ధర, మొత్తం వ్యయం, జీఎస్టీ చెల్లింపులు, టెండర్ ప్రక్రియ వివరాలు కోరుతూ ఓ వ్యక్తి ఆర్టీఐ దరఖాస్తు చేసుకున్నారు.
దీనికి సీబీఎస్ఈ స్పందిస్తూ.. పేపర్ సైజు, పేజీల సంఖ్య వంటి బేసిక్ వివరాలు మాత్రమే వెల్లడించింది. మిగతా వివరాలను ‘రహస్య’, ‘సున్నితమైన’ అంశాలుగా పేర్కొంటూ వెల్లడించేందుకు నిరాకరించింది. పరీక్షల ఫీజుల వ్యయ డేటాను విద్యా సంవత్సరాల వారీగా కాకుండా ఆర్థిక సంవత్సరం ప్రాతిపదికన నిర్వహిస్తున్నందున ఆ వివరాలు ఇవ్వలేమని బోర్డు తెలిపింది.
