తమిళనాడు సీఎం స్టాలిన్ కీలక నిర్ణయం తీసుకున్నారు. కోయంబత్తూర్లో ఈనెల 23న జరిగిన కారు పేలుడు ఘటనపై ఎన్ఐఏ దర్యాప్తును కోరారు. ఎన్ఐఏ దర్యాప్తుకు రికమెండ్ చేస్తూ కేంద్రానికి లేఖ రాశారు. ఈ కేసులో స్థానిక పోలీసులు చేస్తున్న దర్యాప్తులో అంతరాష్ట్ర, అంతర్జాతీయ సంబంధాలు బయటపడడంతో ఎన్ఐఏ దర్యాప్తు కోరారు. తమిళనాడు బీజేపీ అధ్యక్షుడు అన్నామలై సహా ఏఐఏడీంకే నేతలు ఎన్ఐఏ దర్యాప్తుకు డిమాండ్ చేశారు.
ఈ నెల 23న కోయంబత్తూరులోని ఉక్కడంలో ఓ కారులో సిలిండర్ పేలింది. పోలీసులు కేసు నమోదు చేసి దర్యాప్తు చేపట్టగా.. ఘటన వెనక ఉగ్రవాదుల హస్తం ఉన్నట్లు ఆధారాలు లభించాయి. పేలుడుకు ముందు సీసీ కెమెరాలో రికార్డైన దృశ్యాలు పోలీసులకు పలు అనుమానాలను రేకెత్తించాయి. ఈ ప్రమాదంలో మొబిన్ అనే వ్యక్తి మరణించాడు. మొబిన్ తో పాటు మరో నలుగురు వ్యక్తులు.. మొబిన్ ఇంటి నుంచి తెచ్చిన బస్తాను కారులో పెట్టిన కొద్దిసేపటికీ పేలుడు సంభవించింది. ఈ ఘటనలో పోలీసులు ఐదుగురిని అరెస్ట్ చేశారు.
