రియా తండ్రి ఇంద్రజిత్ చక్రవర్తి కామెంట్స్
న్యూఢిల్లీ: బాలీవుడ్ హీరో సుశాంత్ సింగ్ రాజ్ పుత్ కేసులో డ్రగ్ లింక్స్ పై దర్యాప్తు కొనసాగుతోంది. ఈ కేసులో ప్రధాన నిందితురాలైన రియా చక్రవర్తి సోదరుడు షోవిక్ ను నార్కోటిక్స్ కంట్రోల్ బ్యూరో (ఎన్సీబీ) అధికారులు అరెస్ట్ చేశారు. అలాగే రియా ఇంట్లో సోదాలు నిర్వహించి పలు కీలక డాక్యుమెంట్స్ ను స్వాధీనం చేసుకున్నారని సమాచారం. ఈ నేపథ్యంలో రియా తండ్రి, రిటైర్డ్ లెఫ్టినెంట్ కల్నల్ ఇంద్రజిత్ చక్రవర్తి స్పందించారు. షోవిక్ అరెస్ట్ పై ఆయన కామెంట్స్ చేశారు. ‘కంగ్రాట్స్ ఇండియా, మీరు నా కొడుకును అరెస్ట్ చేశారు. నెక్స్ట్ లైన్ లో ఉన్నది నా కూతురే అనుకుంటా. ఆ తర్వాత మరెవరిని అరెస్ట్ చేస్తారో తెలియదు. మీరు చాలా ప్రభావవంతంగా ఓ మధ్య తరగతి కుటుంబాన్ని పడగొట్టారు. న్యాయం కోసం అన్నీ సమర్థించబడుతున్నాయి’ అని ఇంద్రజిత్ చెప్పారు. ఎన్సీబీ దర్యాప్తు ప్రకారం సుశాంత్ తోపాటు మరి కొందరు బాలీవుడ్ స్టార్స్ కు షోవిక్ డ్రగ్స్ అందించే ఫెసిలిటేటర్ గా పని చేసే వాడని సమాచారం.
