హైదరాబాద్, వెలుగు: రాష్ట్రంలోని ప్రైవేట్, కార్పొరేట్ విద్యాసంస్థల్లో కొనసాగుతున్న ఫీజుల దోపిడీని అరికట్టాలని డిమాండ్ చేస్తూ ఏఐఎస్ఎఫ్ స్కూల్ ఎడ్యుకేషన్ డైరెక్టరేట్ను ముట్టడించింది. సోమవారం ఆ సంఘం రాష్ట్ర అధ్యక్ష, ప్రధాన కార్యదర్శులు కసిరెడ్డి మణికంఠరెడ్డి, పుట్ట లక్ష్మణ్ నేతృత్వంలో కార్యకర్తలు, విద్యార్థులు టెలిఫోన్ భవన్ నుంచి ర్యాలీగా వచ్చారు. పోలీసులు వారిని అడ్డుకోవడంతో డైరెక్టరేట్ ముందు బైఠాయించి, నిరసన తెలిపారు. దీంతో పోలీసులు పలువురు నాయకులను అరెస్ట్ చేశారు.
ఈ సందర్భంగా వారు మాట్లాడుతూ... రాష్ట్రంలో ప్రైవేట్ స్కూళ్లు అంగడి కేంద్రాలుగా మారాయని తెలిపారు. ఫీజుల నియంత్రణ చట్టాన్ని గాలికి వదిలేసినా విద్యాశాఖ అధికారులు పట్టించుకోవడం లేదన్నారు. ఈ కార్యక్రమంలో రాష్ట్ర నేతలు గ్యార నరేష్, బానోత్ రఘురాం, రెహమాన్, లెనిన్, చైతన్య యాదవ్, అన్వర్, శాంతి కుమార్, దత్తు రెడ్డి, ఆకాశ్ నాయక్ తదితరులు పాల్గొన్నారు.
