- రైతులను ఆదుకోవాలి
బోధన్, వెలుగు: బోధన్, సాలూర మండలాల్లో సోమవారం రాత్రి కురిసిన వడగండ్లు అకాల వర్షానికి 300 ఎకరాల్లో వరిపంట నష్టం జరిగినట్లు మండల అగ్రికల్చర్ ఆఫీసర్ సంతోష్ నాయక్ తెలిపారు. వరిపంటతోపాటు మందర్నా,హున్సాలోని మామిడి కాయలు రాలిపోయాయి. మండలంలోని మందర్నా, హున్సా, ఖజాపూర్, కుమ్మన్పల్లి, సాలంపాడ్, పెంటకుర్దు, పెంటక్యాంప్ గ్రామాల్లో వరి పంట 60 శాతం నష్టపోయినట్లు రైతులు ఆందోళన చెందుతున్నారు.
చేతికి వచ్చిన పంట అకాలవర్షానికి నేలమట్టం కావడంతో ఎకరానికి రూ.30 వేలు నష్టం వాటిల్లినట్లు రైతులు వాపోయారు. అగ్రికల్చర్ అధికారులు సర్వేచేసి పంటనష్టపరిహారం అందించాలని డిమాండ్ చేస్తున్నారు. మందర్నా, పెంటకుర్దు గ్రామాల్లో అగ్రికల్చర్ ఏఈవోలు, రైతులు, స్థానిక నాయకులు పంటలను పరిశీలించారు. కొనుగోలు కేంద్రాలను ప్రారంభించకపోవడంతో నష్టం పెరిగినట్లు పేర్కొన్నారు.
