అబుధాబి టీ10 లీగ్‌లో డెక్కన్ గ్లాడియేటర్స్ విజేతగా నిలిచింది. డిఫెండింగ్ ఛాంపియన్గా బరిలోకి దిగిన డెక్కన్ గ్లాడియేటర్స్..ఫైనల్లో 37 పరుగుల తేడాతో న్యూయార్క్ స్ట్రైకర్స్పై విజయం సాధించింది.
రైనా విఫలం..
మొదట బ్యాటింగ్ చేసిన సురేష్ రైనా నేతృత్వంలోని గ్లాడియేటర్స్..10 ఓవర్లలో 4 వికెట్లకు 128 పరుగులు చేసింది. నికోలస్ పూరన్ 40 పరుగులు, డేవిడ్ వైస్ 43 పరుగులు సాధించారు. కెప్టన్ రైనా 7 పరుగులే చేసి నిరాశ పర్చాడు. న్యూయార్క్ స్ట్రైకర్స్ బౌలర్లలో అకీల్ హొస్సేన్ రెండు వికెట్లు పడగొట్టాడు. వాహబ్ రియాజ్, పోలార్డ్ తలో ఓ వికెట్ దక్కించుకున్నారు.
పోలార్డ్ ఒక్కడే..
129 పరుగుల టార్గెట్ తో బరిలోకి దిగిన న్యూయార్క్ స్ట్రైకర్స్..గ్లాడియేటర్స్ బౌలర్ల ధాటికి తడబడింది. కేవలం 13 పరుగులకే 3 వికెట్లు కోల్పోయింది. ఆ జట్టు బ్యాట్స్మన్లలో ఇద్దరు టాపార్డర్ బ్యాట్స్ మన్ డకౌట్ అయ్యారు. చివర్లో జోర్దాన్ థాప్సాన్, 22 పరుగులు, పోలార్డ్ 23 పరుగులతో రాణించారు. అయితే ఆప్పటికే చేయాల్సిన రన్ రేట్ పెరిగిపోవడంతో..న్యూయార్క్ స్ట్రైకర్స్ చివరకు 10 ఓవర్లలో 5 వికెట్లు కోల్పోయి 91 పరుగులకే పరిమితమైంది. గ్లాడియేటర్స్ బౌలర్లలో జోష్ లిటిల్, మహమ్మద్ హస్నయిన్ చెరో రెండు వికెట్లు పడగొట్టారు. జహీర్ ఖాన్ ఒక వికెట్ దక్కించుకున్నాడు.
