చైతు చేసిన పనిని నేను మర్చిపోలేను!

సక్సెస్ ఫుల్ రైటర్ గా పేరు తెచ్చకున్న బాబీ ఆ తర్వాత  డైరెక్టర్ గానూ  తనదైన ముద్ర వేశారు. ఆయన డైరెక్ట్ చేసిన ‘వెంకీ మామ’ ఈ నెల 13న రిలీజ్ కానుంది. ఈ సందర్బంగా  బాబీ చెప్పిన విశేషాలు..

‘జై లవకుశ’ తర్వాత మరో స్ర్కిప్టు రెడీ చేసుకుంటుంటే కోన వెంకట్ వచ్చి… వెంకటేష్​, నాగచైతన్యల కాంబినేషన్‌‌లో సురేష్‌‌ ప్రొడక్షన్‌‌ వారు ఒక సినిమా చెయ్యాలనుకుంటున్నారని, ఓసారి వెళ్లి స్టోరీ లైన్ వినమని చెప్పారు. వాళ్లు రాసుకున్నదాన్నినేనెలా ఇంప్లిమెంట్ చేస్తాను, నా కథయితే చేస్తాను అన్నాను. కానీ వదల్లేదు. ఆ కథ నాకు చెప్పించారు. లైన్ నచ్చింది కానీ ఇంప్రెస్ చేయలేకపోయింది. దాంతో మౌనంగా ఉండిపోయా. తర్వాత సురేష్‌‌బాబు గారు రమ్మంటే వెళ్లాను. కథ నాకు నచ్చలేదని చెప్పేశాను. అయితే నువ్వే ఒకటి రాయి అన్నారు. ఫ్రీ హ్యాండ్ ఇవ్వడంతో ఈ కథ తయారు చేశా.

వెంకటేష్​గారు మిలిటరీ నాయుడుగా ఊరిలో చెలామణి అవుతుంటారు. కానీ తను మిలిటరీకి అసలు వెళ్లలేదు. నాయుడు ఇద్దర్నే నమ్ముతాడు… రైతుని,  సైనికుణ్ని. మంచి ప్రిన్సిపుల్స్​ఉన్న వ్యక్తి. నాగచైతన్య చదువుకున్నా మేనమామ చాటు బిడ్డలా పెరుగుతాడు. కానీ ఆర్మీకి వెళతాడు. సీరియస్​ బ్యాక్‌‌డ్రాప్​ ఏమీ ఉండదు. ఎక్కువగా ఫన్ ఉంటుంది. కొంచెం ఎమోషన్​ తోడయ్యింది. హీరోలిద్దరి పాత్రలూ సమానంగా ఉంటాయి. ఒకరు ఎక్కువ, ఒకరు తక్కువ అని ఎక్కడా అనిపించదు. సినిమా చేస్తున్నప్పుడు నేను ఒక్కటే అనుకున్నా. సినిమా చూసే ప్రతివారికీ వాళ్ల మేనమామ ఎక్కడున్నా గుర్తు రావాలి.

సినిమాకి మంచి టీమ్ కూడా కుదిరింది. వెంకటేష్​గారి పక్కన పాయల్‌‌ని తీసుకోవడానికి కారణం.. ఆమె యంగ్ అయినా ముఖంలో మెచ్యూరిటీ కనిపిస్తుంది. ఆడిషన్స్ చేసినప్పుడు కూడా ఆమె పర్‌‌‌‌ఫెక్ట్ అనిపించింది. ఇక రాశి డేట్స్‌‌ లక్కీగా దొరికాయి. తమన్ మంచి మ్యూజిక్​ఇచ్చాడు.

దసరాకి రిలీజవ్వాల్సిన సినిమా ఇది. ఒక సాంగ్​ తీసేటప్పుడు వెంకటేష్​గారి కాలుకి చిన్న గాయం అవడం వల్ల షూటింగ్​ కొంచెం వాయిదా పడింది.  మరికొన్ని రీజన్స్​ వల్ల కూడా డిలే అవుతూ ఇప్పటికి ప్రేక్షకుల ముందుకు రాబోతోంది. ప్రివ్యూ చూసిన వాళ్లంతా చాలా బాగుందనే అన్నారు. చైతూ అయితే నన్ను హగ్​ చేసుకుని థాంక్యూ బ్రదర్​ అన్నాడు. అది నేనెప్పటికీ మరచిపోలేను.

ఈ సినిమాలో ఎమోషన్‌‌ని ఎక్కువ యాడ్ చేశాను కానీ.. బేసిగ్గా నాకు కమర్షియల్​ జానర్​ అంటేనే ఎక్కువ ఇష్టం. నేనేమీ పెద్ద పెద్ద సినిమాలు మాత్రమే తీయాలనేది నియమంగా పెట్టుకోలేదు. కాకపోతే మంచి సినిమాలు మాత్రం తీయాలనుంది. ప్రస్తుతానికి నా దగ్గర  రెండు స్టోరీలు రెడీగా ఉన్నాయి. వాటిలో ఏది ముందు మొదలుపెడతానో డిసైడయ్యాక చెబుతానన్నారు.