- అనుక్షణం కనిపెట్టుకుని ఉండే ‘వీ ల్యాప్’
- ఎప్పటికప్పుడు డాక్టర్లకు గుండె డేటా
- తయారు చేసిన ఇజ్రాయెల్ కంపెనీ
ఒంటిపై ఎక్కడైనా దెబ్బ తగిలితే మనకు తెలిసిపోతుంది. దాన్ని బట్టి ట్రీట్మెంట్ చేయించుకుంటాం. మందులు వాడతాం. కానీ, మామూలుగా ఒంటి లోపల ఏం జరుగుతోందో తెలుసుకోవడం ఓ మనిషికి కష్టమే. లోపల గడబిడగా ఉన్నా, ఛాతి నొప్పి వచ్చినా జస్ట్ ఆ లక్షణాలకు మాత్రమే ట్రీట్మెంట్ తీసుకోవాల్సిన పరిస్థితి. ఒక్కోసారి ఆ ఛాతి నొప్పే గుండె నొప్పి కూడా అయి ఉండొచ్చు. అది మనం గుర్తించలేకపోవచ్చు. మరి, దానిని గుర్తించేదెలా? ప్రత్యేకించి గుండె జబ్బులున్నోళ్లలో, ఆ గుండె పనితీరును అంచనా వేసేదెలా? దానికే ఇజ్రాయెల్కు చెందిన వెక్టోరియస్ మెడికల్ టెక్నాలజీస్ అనే సంస్థ, గుండెని అంటిపెట్టుకుని ఉండి, ఎప్పటికప్పుడు కంటికిరెప్పలా కాచుకుని ఉండే బుల్లి కంప్యూటర్ డివైస్ ‘వీ ల్యాప్’ను తయారు చేసింది. తొలిసారిగా లండన్లోని 71 ఏళ్ల పేషెంట్కు హ్యామర్స్మిత్ హాస్పిటల్ డాక్టర్లు ఆ బుల్లి కంప్యూటర్ను అమర్చారు.
ఉండేదెక్కడ.. పనిచేసేదెట్ల?
వీ ల్యాప్ను డైరెక్ట్గా గుండెలోనే పెట్టేస్తారు. వ్యక్తి రక్తనాళాల నుంచి ఓ చిన్న పైప్తో వీల్యాప్ను పంపి రెండు కర్ణిక (ఆట్రియం)ల మధ్య అమరుస్తారు. అక్కడ అది నెట్లా తెరుచుకుంటుంది. అలా గుండెలోకి చేరిన వీ ల్యాప్, గుండె వేగం, పనితీరును ఎప్పటికప్పుడు కనిపెట్టుకుని ఉంటుంది. గుండెలో రక్తపోటును (బీపీ) అంచనా వేస్తుంది. ఆ డేటాను ఏఐ (ఆర్టిఫిషియల్ ఇంటెలిజెన్స్) ఎప్పటికప్పుడు విశ్లేషిస్తూ డాక్టర్లకు సమాచారాన్ని పంపుతుంది. తద్వారా టైంకు ఏయే మందులు వాడాలో పేషెంట్కు డాక్టర్ చెప్పే అవకాశం ఉంటుంది. ప్రాణాపాయాలను తప్పించేందుకు వీలుంటుంది. దీనికి చార్జింగ్ పెట్టేందుకు బ్యాటరీల అవసరమూ లేదు. దాని కోసం పవర్ బెల్ట్ను వీల్యాప్తో పాటు ఇస్తారు. దాన్నుంచే గుండెలోపలున్న వీల్యాప్ను డైరెక్ట్గా చార్జ్ చేసుకోవచ్చు. ప్రపంచ వ్యాప్తంగా ఉన్న గుండె రోగులకు ఇది వరమని డాక్టర్లు చెబుతున్నారు.
వీల్యాప్తో ముందే పసిగట్టొచ్చు
పేషెంట్ల గుండెల్లో జరిగే మార్పులను బయటి నుంచి పక్కాగా తెలుసుకోవడం కష్టమని, వీల్యాప్తో ఆ బెడద తీరుతుందని హ్యామర్స్మిత్ హాస్పిటల్ డాక్టర్ జాచరీ వినెట్ చెప్పారు. వీ ల్యాప్తో గుండెలో జరిగే మార్పులను వెంటనే తెలుసుకుని మందులు అందించేందుకు అవకాశం ఉంటుందన్నారు. దీని వల్ల సింప్టమ్స్ తగ్గి, హాస్పిటల్లో చేరడం తగ్గుతుందన్నారు. బ్యాటరీ అవసరం లేకుండా డిజిటల్గా డేటాను ట్రాన్స్ఫర్ చేసేలా వీల్యాప్ ఉపయోగపడుతుందని వెక్టోరియస్ ఓనర్ ఒరెన్ గోల్డ్ష్టీన్ చెప్పారు.
