న్యూఢిల్లీ: ‘డ్రాప్డ్ హెడ్ సిండ్రోమ్’ అనే కండరాల జబ్బుతో పుట్టిందా చిన్నారి. వెన్నులో లోపం కారణంగా తల కిందకు వంగిపోయి నరకాన్ని అనుభవించింది. ఇప్పుడు 13 ఏండ్ల ఆ బాలికకు ఢిల్లీలోని ఇంద్రప్రస్థ అపోలో హాస్పిటల్ డాక్టర్లు ఆపరేషన్ చేసి తల ఎత్తుకునేలా చేశారు. పుట్టుకతోనే జబ్బున్నా ఆ లోపాన్ని చిన్నారి తల్లిదండ్రులు ప్రారంభంలో గుర్తించలేకపోయారు. సీరియస్ నెస్ తెలియక నిర్లక్ష్యం చేశారు. దీంతో వయసు పెరుగుతున్న కొద్దీ ఆ చిన్నారి తల కిందకు వంగిపోయింది. పుట్టినప్పుడే డిజార్డర్ ఉన్నా.. పెరుగుతున్నకొద్దీ లక్షణాలు బయటపడ్డాయని, గత కొన్నేండ్ల నుంచే తమ బిడ్డ పరిస్థితి సీరియస్ అయిందని చిన్నారి తల్లిదండ్రులు ఆవేదన చెందుతున్నారు. కొద్దిదూరం నడిచినా ఊపిరి తీసుకోలేకపోయేదని చెప్పారు. రానురాను మాటలు పోయాయని, వినికిడి లోపం వచ్చిందన్నారు. దీంతో ఆస్పత్రిలో చేర్పిస్తే తొలుత హాలో గ్రావిటీ ట్రీట్మెంట్ చేశారని, ఆ తర్వాత ఆపరేషన్ చేసి తలను సరిచేశారని పేర్కొన్నారు. ‘‘పుట్టుకతోనే ఆ పాపకు సెరిబ్రల్ పాల్సీతో పాటు క్రేనియో సర్వికల్ డిస్లొకేషన్, వెన్ను వంగిపోవడం వంటి జబ్బులున్నాయి. శ్వాస కూడా సరిగ్గాలేదు. పోషకాహారలోపంతోనూ బాధపడుతోంది. అందువల్ల ఆపరేషన్ కొంచెం కష్టమైంది. ఆస్పత్రిలో చేర్పించాక ముందు హాలో గ్రావిటీ ట్రీట్మెంట్ చేశాం. ఆ తర్వాత కొన్ని రోజులకు విజయవంతంగా ఆపరేషన్ చేశాం. ఆపరేషన్కు 6 గంటల టైం పట్టింది’’ అని ఆస్పత్రి జాయింట్ రీప్లేస్మెంట్, స్పైన్ సర్జరీ సీనియర్ కన్సల్టెంట్ డాక్టర్ రాజగోపాల్ కృష్ణన్ చెప్పారు.
