- బీఆర్ఎస్లో చేరిన చెరుకు సుధాకర్
నల్గొండ, వెలుగు : తెలంగాణ ఉద్యమకారుడు డాక్టర్ చెరుకు సుధాకర్.. బీఆర్ఎస్లో చేరారు. శనివారం హైదరాబాద్లో మంత్రులు కేటీఆర్, హరీశ్ రావు, జగదీశ్ రెడ్డి, ఎమ్మెల్యే చిరుమర్తి లింగయ్య సమక్షంలో ఆయన తిరిగి సొంత గూటికి చేరుకున్నారు. తెలంగాణ రాష్ట్ర సాధనలో భాగంగా సీఎం కేసీఆర్తో కలిసి ఉద్యమంలో పాల్గొన్న సుధాకర్.. 2003లో బీఆర్ఎస్లో చేరారు. ఆ తర్వాత పార్టీలో విధానాలు నచ్చక ఆ పార్టీకి రాజీనామా చేసి బీజేపీలో చేరారు. 2014 ఎన్నికల్లో ఆయన భార్య లక్ష్మి నకిరేకల్ ఎమ్మెల్యే పదవికి పోటీ చేశారు.
బీజేపీ విధానాలు నచ్చక తెలంగాణ ఇంటి పార్టీ స్థాపించారు. ఆ పార్టీ తరపున గ్రాడ్యుయేట్ ఎన్నికల్లో చెరుకు పోటీ చేశారు. ఆ పార్టీని ఇటీవల కాంగ్రెస్లో విలీనం చేశారు. కాంగ్రెస్లోనూ ఎంపీ కోమటిరెడ్డి వెంకటరెడ్డితో ఆయనకు రాజకీయంగా విభేదాలు తలెత్తాయి. ఇంకోవైపు ఉదయ్పూర్ బీసీ డిక్లరేషన్ అమలు చేయాలని సుధాకర్ డిమాండ్ చేశారు. కొద్ది రోజులుగా పార్టీ కార్యక్రమాలకు దూరంగా ఉంటున్న సుధాకర్ను తిరిగి బీఆర్ఎస్లోకి రప్పించేందుకు జిల్లా మంత్రి జగదీశ్ రెడ్డి, ఎమ్మెల్యే చిరుమర్తి లింగయ్య చొరవ తీసుకున్నారు.
