తహసీల్దార్ ఆఫీస్ ఎదుట రైతు కుటుంబం ధర్నా
రాజాపేట, వెలుగు: తమ స్థలంలో శ్మశానవాటిక కట్టొద్దంటూ కోర్టు ఆర్డర్ ఇచ్చినా పట్టించుకోకుండా పనులు చేస్తున్నారంటూ రైతు కుటుంబ సభ్యులు తహసీల్దార్ ఆఫీస్ఎదుట ధర్నాకు దిగారు. ఈ ఘటన యాదాద్రి భువనగిరి జిల్లా రాజాపేట మండలంలో బుధవారం చోటుచేసుకుంది. బాధిత కుటుంబ సభ్యులు తెలిపిన వివరాల ప్రకారం.. రాజాపేట మండలం బసంతపురం గ్రామానికి చెందిన గొల్లపల్లి లక్ష్మి, నరసయ్య దంపతులకు 137/బి సర్వే నంబర్లో 9.03 ఎకరాల వ్యవసాయ భూమి ఉంది. వీరి నుంచి ఎలాంటి అనుమతి తీసుకోకుండానే ఇక్కడ ఆఫీసర్లు శ్మశాన వాటిక నిర్మాణ పనులు ప్రారంభించారు. నరసయ్య పలుమార్లు ఆఫీసర్లకు విన్నవించుకున్నా పట్టించుకోకపోవడంతో కోర్టును ఆశ్రయించాడు. దీంతో సర్పంచ్ వెంకట్రెడ్డి సహా తొమ్మిది మందికి ఆలేరు కోర్టు నోటీసులు జారీ చేసింది. రైతు జాగాలో ఎటువంటి నిర్మాణాలు చేపట్టొద్దంటూ మండల స్థాయి ఆఫీసర్లకు ఆర్డర్స్ ఇచ్చింది. అయినప్పటికీ నిర్మాణ పనులు కొనసాగిస్తూనే ఉన్నారు. పనులను అడ్డుకోబోయిన తమపై సర్పంచ్ దౌర్జన్యానికి దిగారని బాధిత కుటుంబ సభ్యులు ఆరోపించారు. బుధవారం తహసీల్దార్ ఆఫీస్ ఎదుట ధర్నా చేశారు. కోర్టు ఆర్డర్ అమలయ్యేలా చూడాలని ఆఫీసర్లకు విజ్ఞప్తి చేశారు. ఆఫీస్ ఆవరణలో సర్పంచ్ దౌర్జన్యానికి వ్యతిరేకంగా నినాదాలు చేశారు. గ్రామంలో పోరంబోకు, ప్రభుత్వ భూములు ఉన్నప్పటికీ తమ భూమిలోనే శ్మశానవాటిక నిర్మాణాలు చేపడుతున్నారని, తమకు న్యాయం చేయాలని కోరారు.
