అభ్యర్థుల ఎంపికపై ఉత్కంఠ

మూడు ప్రధాన పార్టీల్లో మిగిలిన స్థానాలపై కసరత్తు
ఒకటీ రెండు రోజుల్లో కాంగ్రెస్ సెకండ్ లిస్టు
ఇప్పటికే నాలుగు సీట్లకు అభ్యర్థుల ప్రకటన
13 సీట్లలో క్యాండిడేట్ల కోసం కొనసాగుతున్న చర్చలు
ఇందులో 6 స్థానాలపై పార్టీ సీఈసీలో ఏకాభిప్రాయం
హైదరాబాద్లో అనూహ్యంగా తెరపైకి లాయర్ తబస్సుమ్
ఇప్పటికే 15 సీట్లకు క్యాండిడేట్లను ఖరారు చేసిన బీజేపీ
ఖమ్మం, వరంగల్ సీట్లు పెండింగ్.. రేపు ప్రకటించే చాన్స్
ఇంకా 6 సీట్లకు క్యాండిడేట్లను వెతుకుతున్న బీఆర్ఎస్
పోటీకి దూరంగా ముఖ్య నేతలు.. ఇతర పార్టీల వైపు చూపు
ఇప్పటికే ప్రకటించిన స్థానాల్లోనూ అభ్యర్థుల విముఖత

హైదరాబాద్, వెలుగు : లోక్సభ ఎన్నికలకు షెడ్యూల్ విడుదల కావ డంతో రాష్ట్రంలోని ప్రధాన పార్టీల్లో అభ్యర్థుల ఎంపికపై ఉత్కంఠ కొనసాగుతున్నది. ఈ విషయంలో బీజేపీ కొంచెం స్పీడ్తో ఉండగా.. కాంగ్రెస్, బీఆర్ఎస్ పార్టీల్లో మాత్రం ఇంకా పలు స్థానాలపై క్లారిటీ రాలేదు. కాంగ్రెస్ టికెట్ల కోసం ఎక్కువ మంది పోటీ పడుతుండటంతో ఆ పార్టీలో చర్చోపచర్చలు సాగుతున్నాయి. రాష్ట్రంలోని మొత్తం 17 లోక్సభ స్థానాలకు గాను ఇటీవల ఫస్ట్ లిస్టులో నాలుగు సీట్లకు అభ్యర్థులను కాంగ్రెస్ హైకమాండ్ ఖరారు చేసింది. మిగిలిన 13 స్థానాలకు ప్రకటించాల్సి ఉంది. పోటీ తీవ్రంగా ఉండటంతో సర్వేలు, సామాజిక సమీకరణల ఆధారంగా క్యాండిడేట్లను హైకమాండ్ ఖరారు చేస్తున్నది. బీఆర్ఎస్ పరిస్థితి మాత్రం భిన్నంగా ఉన్నది. సిట్టింగ్ ఎంపీలతోపాటు ఎమ్మెల్యేలు కూడా ఇతర పార్టీల్లో జాయిన్ అవుతుండటం, లోక్సభ ఎన్నికల బరిలో నిలిచేందుకు ముఖ్య నేతలు వెనుకడుగు వేస్తుండటంతో క్యాండిడేట్ల కోసం గులాబీ టీమ్ ఎదురుచూడాల్సి వస్తున్నది. ఇప్పటి వరకు 11 స్థానాలకు బీఆర్ఎస్ అభ్యర్థులు ఖరారైనప్పటికీ వారిలోనూ కొందరు ఇతర పార్టీల్లో చేరేందుకు ప్రయత్నిస్తున్నట్టు ప్రచారం నడుస్తున్నది. బీజేపీ 15 స్థానాల్లో అభ్యర్థులను ప్రకటించి ముందంజలో ఉన్నది. మరో రెండు స్థానాలను ప్రకటించాల్సి ఉన్నది. అయితే, ఎన్నికల షెడ్యూల్ రావడంతో త్వరగా అభ్యర్థులను ప్రకటిస్తే నియోజకవర్గాల్లో పనిచేసుకుంటామని ఆశావహులు అంటున్నారు. గురువారం కాంగ్రెస్ సీఈసీ మీటింగ్ను నిర్వహించనుండగా.. శుక్రవారం బీజేపీ కూడా పార్లమెంటరీ కమిటీ మీటింగ్ను ఏర్పాటు చేసి మిగతా స్థానాలకు అభ్యర్థులను ప్రకటించే అవకాశం ఉంది.

కాంగ్రెస్లో పోటీ ఫుల్

నల్గొండ, మహబూబ్నగర్, మహబూబాబాద్, జహీరాబాద్ సీట్లకు ఫస్ట్ లిస్టులో కాంగ్రెస్ పార్టీ అభ్యర్థులను ప్రకటించింది. మిగిలిన 13 స్థానాల్లో అభ్యర్థుల ఎంపిక కోసం కసరత్తు నడుస్తున్నది. మంగళవారం జరిగిన కాంగ్రెస్ పార్టీ సీఈసీ మీటింగ్లో చేవెళ్ల (రంజిత్ రెడ్డి), నాగర్కర్నూల్ (మల్లు రవి), పెద్దపల్లి (గడ్డం వంశీ కృష్ణ), ఆదిలాబాద్(ఆత్రం సుగుణ), మల్కాజ్గిరి (పట్నం సునీతా రెడ్డి), సికింద్రాబాద్ (దానం నాగేందర్) స్థానాలపై ఏకాభిప్రాయం కుదిరినట్టు తెలుస్తున్నది. ఏడు స్థానాల్లో మాత్రం పీటముడులున్నట్టు పార్టీ వర్గాలు చెప్తున్నాయి. ఈ స్థానాల్లో ఆశావాహులు ఎక్కువ మంది ఉండటంతో సామాజిక సమీకరణాలు, సర్వేలో విన్నింగ్ పర్సంటేజీలను బేస్ చేసుకొని క్యాండిడేట్స్ను ఖరారు చేసేందుకు కాంగ్రెస్ నాయకత్వం చర్చలు జరుపుతున్నది. ఖమ్మం టికెట్ కోసం డిప్యూటీ సీఎం మల్లు భట్టి విక్రమార్క భార్య మల్లు నందిని, మంత్రి పొంగులేటి శ్రీనివాస్రెడ్డి తమ్ముడు ప్రసాద్ రెడ్డి మధ్య పోటీ ఉంది.

అయితే, సామాజిక సమీకరణాల నేపథ్యంలో ఆ స్థానం దాదాపు పొంగులేటి ప్రసాద్రెడ్డికే ఖాయమైందన్న టాక్ వినిపిస్తున్నది. నాగర్కర్నూల్ టికెట్ను భట్టి విక్రమార్క సోదరుడు మల్లు రవికి ఇస్తామని సీఈసీలో పార్టీ పెద్దలు చెప్పారని, దీంతో భట్టి కుటుంబంలో ఒకరికి ఎంపీ టికెట్ (మల్లు రవికి) దాదాపు ఖరారైనందున ఖమ్మం స్థానంలో మల్లు నందినికి టికెట్ ఇవ్వకపోవచ్చని పార్టీ వర్గాలు అంటున్నాయి. నాగర్కర్నూల్ నుంచి మల్లు రవిని బరిలోకి దింపే చాన్స్ ఉండంటంతో ఇదే స్థానం నుంచి టికెట్ ఆశిస్తున్న సంపత్ కుమార్కు నిరాశ తప్పేలా లేదని ఆ వర్గాలు చెప్తున్నాయి. భువనగిరి టికెట్ కోసం కూడా ఇద్దరు లీడర్ల మధ్య పోటీ నెలకొంది. ఈ స్థానం నుంచి ఎమ్మెల్యే కోమటిరెడ్డి రాజగోపాల్రెడ్డి భార్య లక్ష్మి, పీసీసీ వైస్ ప్రెసిడెంట్ చామల కిరణ్ కుమార్ రెడ్డి టికెట్ ఆశిస్తున్నారు. సర్వేల ప్రకారం లక్ష్మి వైపే పార్టీ అధిష్టానం మొగ్గు చూపుతున్నట్లు కాంగ్రెస్ సర్కిల్స్లో చర్చ నడుస్తున్నది.

హైదరాబాద్ స్థానంలో తెరపైకి కొత్త పేరు!

హైదరాబాద్ ఎంపీ టికెట్ విషయంలో కాంగ్రెస్ పార్టీ మొదటి నుంచి అలీ మస్కతీ పేరును పరిశీలిస్తున్నది. అయితే ఇప్పుడు ఓ మహిళా అడ్వకేట్ పేరు తెరపైకి వచ్చింది. సుప్రీంకోర్టు అడ్వకేట్గా ఉన్న షానవాజ్ తబసుమ్కు టికెట్ ఇచ్చే యోచనలో పార్టీ పెద్దలు ఉన్నట్లు కాంగ్రెస్ వర్గాల్లో ప్రచారం నడుస్తున్నది. కాంగ్రెస్ సీఈసీ మీటింగ్లోనూ ఆమె పేరు చర్చకు వచ్చినట్టు తెలిసింది. ఆలిండియా ఆజాద్ కాంగ్రెస్ పార్టీకి వ్యవస్థాపకురాలైన షానవాజ్ తబసుమ్కు టికెట్ ఇచ్చి బరిలోకి దింపితే మహిళా సెంటిమెంట్, ముస్లిం ఓటు బ్యాంకు కలిసి వస్తాయని పార్టీ వర్గాలు భావిస్తున్నాయి.

మల్కాజ్గిరి కాంగ్రెస్ టికెట్ పట్నం సునీతా రెడ్డికి ఖాయమని భావిస్తున్నా.. కంచర్ల చంద్రశేఖర్ రెడ్డి కూడా ఇక్కడి నుంచి పార్టీ టికెట్ కోసం ప్రయత్నిస్తున్నట్టు తెలుస్తున్నది.
ఇటీవల బీఆర్ఎస్ నుంచి కాంగ్రెస్లో చేరిన ఎమ్మెల్యే దానం నాగేందర్ను సికింద్రాబాద్ ఎంపీ స్థానం నుంచి బరిలోకి దింపాలని పార్టీ భావిస్తున్నా.. ఇప్పటికే ఆ సీటు కోసం జీహెచ్ఎంసీ మాజీ మేయర్ బొంతు రామ్మోహన్ ప్రయత్నాలు చేస్తున్నారు.
నిజామాబాద్ నుంచి ఎమ్మెల్సీ జీవన్రెడ్డి, కరీంనగర్ నుంచి అలిగిరెడ్డి ప్రవీణ్రెడ్డి పేర్లు వినిపిస్తున్నాయి. ఈ స్థానాలకు అభ్యర్థుల్లో మార్పులుండే అవకాశాలున్నట్టు తెలుస్తున్నది. నిజామాబాద్ టికెట్ కోసం ఆరెంజ్ ట్రావెల్స్ ఓనర్ సునీల్రెడ్డి కూడా ప్రయత్నిస్తున్నారు.
వరంగల్ టికెట్ పసునూరి దయాకర్కు ఇచ్చే యోచనలో కాంగ్రెస్ హైకమాండ్ ఉన్నట్టు సమాచారం.
ఆదిలాబాద్లో ఆత్రం సుగుణకు ఇవ్వాలని అనుకుంటున్నా.. ఆదివాసీ డాక్టర్ అయిన సుమలత పేరు కూడా వినిపిస్తున్నది.

వరంగల్, ఖమ్మం బీజేపీ అభ్యర్థులు ఎవరో?

వరంగల్, ఖమ్మం స్థానాల్లో బీజేపీ అభ్యర్థులను ప్రకటిస్తే రాష్ట్రంలో ఆ పార్టీ అభ్యర్థుల ఎంపిక పూర్తయిపోయినట్టే. బీఆర్ఎస్ నుంచి వచ్చిన మాజీ ఎమ్మెల్యే ఆరూరి రమేశ్ను వరంగల్ అభ్యర్థిగా ప్రకటించే చాన్స్ ఉంది. అయితే, ఆ స్థానం నుంచి పోటీ చేయాలని రిటైర్డ్ ఐపీఎస్ కృష్ణ ప్రసాద్ ఆశలు పెట్టుకున్నారు. తనకు టికెట్ ఇవ్వాలని బీజేపీ పెద్దలను ఆయన కోరుతున్నారు. మరో స్థానం ఖమ్మంపై మాత్రం పార్టీలో సందిగ్ధత నెలకొంది. మాజీ సీఎం జలగం వెంగళ్రావు కుమారుడు జలగం వెంకట్రావు ఇటీవల బీజేపీలో చేరారు. ఖమ్మం టికెట్ వెంకట్రావుకే ఇస్తారని భావిస్తున్నప్పటికీ .. తెరపైకి కొత్తవారిని తెచ్చే అవకాశం ఉంది. ఇందులో భాగంగా బీఆర్ఎస్ సిట్టింగ్ ఎంపీ నామా నాగేశ్వర రావును పార్టీలో చేర్చుకుని ఆయనకు టికెట్ఇవ్వొచ్చని బీజేపీ వర్గాలు చెప్తున్నాయి. ఈ రెండు స్థానాలకు అభ్యర్థులను శుక్రవారం జరిగే బీజేపీ పార్లమెంటరీ కమిటీ మీటింగ్లో ప్రకటించే అవకాశం ఉంది.