పదేండ్ల ఆశిష్ టీవీ చూస్తున్నాడు. ఆ పక్కనే మూడేండ్ల తమ్ముడు అయాన్ ఆడుకుంటూ రూపాయి బిళ్ల మింగేశాడు. అది గొంతులో ఇరుక్కోవడంతో ఉక్కిరిబిక్కిరి అయింది ఆ చిన్నారికి.. ఒళ్లు ఊదా రంగులోకి మారిపోయింది. విపరీతంగా దగ్గు వస్తోంది. అది గమనించిన అయాన్ వెంటనే తమ్ముడ్ని కాళ్లపై బోర్లా పడుకోబెట్టుకున్నాడు. వెనక భాగంలో గట్టిగా నాలుగుసార్లు కొట్టి, ఆ బిళ్లని బయటకు తీశాడు. దీనికి కారణం స్కూల్లో నేర్చుకున్న ఫస్ట్ ఎయిడ్ స్కిల్స్. పిల్లలు కచ్చితంగా నేర్చుకోవాల్సిన లైఫ్ స్కిల్స్ ఇవి.
ప్రతి క్షణం పిల్లల్ని కనిపెట్టుకొని ఉండటం తల్లిదండ్రులకి సాధ్యం కాదు. అందుకే పేరెంట్స్ చుట్టుపక్కల లేనప్పుడు.. ఎవర్ని వాళ్లు, అలాగే చుట్టూ ఉన్నవాళ్లని ఎలా ప్రొటెక్ట్ చేసుకోవాలో పిల్లలకి ముందు నుంచే నేర్పించాలి. ఈ బేసిక్ నాలెడ్జ్ వాళ్లని ఎన్నో ప్రమాదాల నుంచి కాపాడుతుంది. పిల్లలకి నేర్పించాల్సిన ఫస్ట్ ఎయిడ్ బేసిక్స్ ఏంటంటే....?
ఎమర్జెన్సీ సర్వీస్
నేషనల్ ఎమర్జెన్సీ నెంబర్ 112 పై పిల్లలకి అవేర్నెస్ కల్పించాలి. ఈ నెంబర్ని వాళ్లు గుర్తు పెట్టుకునేలా చేయాలి. అలాగే అత్యవసర పరిస్థితిని 112 ఆపరేటర్కి ఎలా వివరించాలన్నది .. డెమో రూపంలో చూపించాలి. లాక్ బటన్ని మూడుసార్లు నొక్కినా, 112 కి ఫోన్ వెళ్తుందన్న విషయం కూడా వాళ్లకి చెప్పాలి. అలాగే డయల్ 100పైనా అవగాహన పెంచాలి. అయితే ఈ నెంబర్లకి కేవలం ఏదైనా ప్రమాదంలో ఉన్నప్పుడు మాత్రమే ఫోన్ చేయాలన్నది వాళ్లకి అర్థమయ్యేలా చెప్పాలి. ఇంట్లో వాళ్ల ఫోన్ నెంబర్లు, ఇంటి అడ్రస్ కూడా గుర్తుంచుకునేలా చెప్పాల్సిన బాధ్యత పేరెంట్స్దే.
సాయం అడగమనాలి
పిల్లలకి ఏ పరిస్థితుల్లో ఎలా నడుచుకోవాలన్నది పేరెంట్స్ చెప్పాలి. ఉదాహరణకి ఇంట్లో తమ్ముడు లేదా చెల్లికి గాయం అయినప్పుడు.. ఐస్ పెట్టడం లేదా పసుపు రాయడం లాంటివి చేయమనాలి. ఇంట్లోని అమ్మమ్మ లేదా తాతయ్య కళ్లు తిరిగి పడిపోతే.. వెంటనే ఇంట్లో లేదా చుట్టుపక్కల ఉన్నవాళ్లని సాయం అడగమనాలి. అలాగే ఇంట్లోని పెద్దవాళ్ల హెల్త్ కండీషన్స్ గురించి పిల్లలతో మాట్లాడాలి. పిల్లలకి ఏదైనా ఆరోగ్య సమస్య ఉన్నా.. దాని గురించి వాళ్లకి అవగాహన కల్పించాలి.
ఫస్ట్ ఎయిడ్ కిట్
పిల్లలతో కలిసి ఫస్ట్ ఎయిడ్ కిట్ ప్రిపేర్ చేయాలి పేరెంట్స్. బ్యాండేజ్, ఆయింట్మెంట్, యాంటీ సెప్టిక్ మందులు, దూది ఇలా అన్నీ వాళ్లతోనే కిట్లో పెట్టిస్తూ..వాటిని ఎప్పుడు, ఎలా వాడాలో చెప్పాలి. అలాగే వాటిని ఎందుకు వాడుతున్నారు.. అవి ఎలా మనల్ని కాపాడతాయో కూడా చెప్పాలి. ఉదాహరణకి గాయాలపై యాంటీ సెప్టిక్ లిక్విడ్ రాస్తే దానిపై ఉండే చెడు బ్యాక్టీరియా చనిపోతుందని చెప్పాలి. అలాగే తలకి లేదా చేతులకి గాయం అయి రక్తం కారుతుంటే.. వెంటనే టవల్ లేదా కర్చీఫ్ని గాయంపై గట్టిగా అదిమి పెట్టాలని చెప్పాలి.
అబ్జర్వేషన్
పిల్లలకి రైట్, రాంగ్ సిగ్నల్స్ గురించి చెప్పాలి. అంటే.. ఏది తప్పు, ఏది ఒప్పు అనే విషయం వాళ్లకి తెలిసేలా చేయాలి. కొత్త ప్రాంతాలకి వెళ్లినప్పుడు, కొత్త మనుషుల మధ్య ఉన్నప్పుడు.. చుట్టూ ఉన్న పరిసరాల్ని అబ్జర్వ్ చేయమనాలి. అలాగే పరిస్థితి ఏదైనా సరే కంగారు పడకుండా మైండ్ని అలర్ట్గా ఎలా ఉంచాలో నేర్పించాలి.
మంటల్లో చిక్కుకుంటే
చుట్టు పక్కల మంటలు అల్లుకుంటే.. స్టాప్, డ్రాప్, అండ్ రోల్ టెక్నిక్ ఫాలో అవ్వమనాలి. అంటే మంటలు అంటుకున్నప్పుడు పారిపోకుండా ఆగి, నేల మీద పడుకొని అటుఇటు పొర్లమనాలి. అలాగే ఆటలు ఆడేటప్పుడు కాళ్లు, చేతులు బెణకడం లాంటివి జరిగితే తీసుకోవాల్సిన జాగ్రత్తల గురించి అవగాహన కల్పించాలి.
